“आम्हाला जुनी मुक्ता पाहिजे”, ‘प्रेमाची गोष्ट’ मालिकेच्या महाएपिसोडच्या प्रोमोवर नेटकऱ्यांच्या प्रतिक्रिया; म्हणाले, “तेजश्री प्रधान असती तर…”

‘प्रेमाची गोष्ट’ मालिकेचा २ फेब्रुवारीला महाएपिसोड रंगणार आहे. या महाएपिसोडचा प्रोमो अलीकडेच ‘स्टार प्रवाह’च्या सोशल मीडियावर शेअर करण्यात आला होता. या प्रोमोमध्ये सावनीचं नवं कारस्थान पाहायला मिळत आहे. आदित्यच्या कस्टडीच्या बदल्यात सावनी सईला घेऊन जाताना दिसत आहे. पण, यावेळी सई सावनीच्या हाताला चावते आणि मुक्ताकडे धावत येऊन तिला मिठी मारते. तेव्हा मुक्ता म्हणते, “हा एक कागदाचा तुकडा माझ्या या काळजाच्या तुकड्याला कधीच दूर करू शकणार नाही.” त्यानंतर मुक्ता सईला घट्ट मिठी मारताना पाहायला मिळत आहे. याचा प्रोमोवर अनेक नेटकऱ्यांनी “जुनी मुक्ता पाहिजे”, “तेजश्री प्रधानची जागा कोणीच घेऊ शकत नाही”, “तेजश्री असती तर खूप छान झालं असतं”, अशा प्रतिक्रिया दिल्या आहेत.

एका नेटकऱ्याने लिहिलं आहे, “या सीनमध्ये तेजश्री असती तर हा सीन किती भावनिक झाला असता. यात काहीच भावना नाहीयेत.” तर दुसऱ्या नेटकऱ्याने लिहिलं की, ही मुक्ता आल्यापासून मालिकेत भावना दिसत नाहीयेत. जे आधी होतं. आधीची मुक्ता फक्त सई माऊ म्हणाली तरी वेगळं वाटतायचं. पण हीच तसं काहीच वाटतं नाही. तसंच तिसऱ्या नेटकऱ्याने लिहिलं, “ही नवी मुक्ता ना सागरबरोबर चांगली दिसत, ना सईबरोबर चांगली दिसत. बाकी सगळे जाऊ देत. तिच्या जागेवर जुनी मुक्ता असती तर खूप छान झालं असतं. तिचे प्रोमो पाहून डोळ्यात पाणी यायचं जे हिला बघून अजिबात येत नाही.” चौथ्या नेटकऱ्याने लिहिलं की, तेजश्री प्रधानसारखा अभिनय करायला स्वरदाला १ टक्के जमत नाही. म्हणूनच आम्हाला तिचं मुक्ता पाहिजे आहे. नवीन नको. परत आणा त्याच मुक्ताला प्लीज लवकरात लवकर. अशा बऱ्याच प्रतिक्रिया नेटकऱ्यांच्या उमटल्या आहेत.

दरम्यान, स्वरदा ठिगळेच्या कामाबद्दल बोलायचं झालं तर, तिने २०१३ साली ‘माझे मन तुझे झाले’ या मालिकेतून अभिनय क्षेत्रात पाऊल ठेवलं होतं. यानंतर ती हिंदी मालिकेत झळकली. तिने ‘सावित्री देवी कॉलेज’ या हिंदी मालिकेत काम केलं होतं. त्यानंतर तिने ‘प्यार के पापड’ या मालिकेतही काम केलं. या दोन हिंदी मालिकेनंतर ती पुन्हा मराठी मालिकेत झळकली. ‘स्वराज्य सौदामिनी ताराराणी’ या मालिकेत तिने ताराराणी यांची भूमिका उत्तमरित्या साकारली. या भूमिकेसाठी तिला सर्वोत्कृष्ट अभिनेत्रीचा पुरस्कार देखील मिळाला होता.