छोट्या पडद्यावरील ‘ये रिश्ता क्या कहलाता है’ ही लोकप्रिय मालिका आहे. या मालिकेतील कलाकारांवर प्रेक्षक भरभरुन प्रेम करतात. गेली १४ वर्ष ही मालिक व त्यातील कलाकार प्रेक्षकांचं अविरत मनोरंजन करत आहेत. या मालिकेतून अक्षरा हे पात्र साकारुन हिना खान घराघरात पोहेचली. अक्षराच्या आईची भूमिका साकारलेली अभिनेत्री लता सबरवाल यांनाही याच मालिकेमुळे लोकप्रियता मिळाली.
लता सबरवाल यांनी गेल्याच वर्षी छोट्या पडद्यापासून दूर होण्याचा निर्णय घेतला होता. पोस्ट शेअर करत त्यांनी मालिकाविश्वाला रामराम केला असल्याचं सांगितलं होतं. लता सबरवाल सध्या गंभीर आजाराचा सामना करत आहेत. सोशल मीडियावरुन पोस्ट शेअर करत त्यांनी ही माहिती चाहत्यांनी दिली आहे. लता सबरवाल या मागील काही काळापासून घशाच्या आजाराने त्रस्त आहेत. योग्य उपचार न झाल्यास आवाजही गमावण्याची भीती त्यांनी व्यक्त केली आहे.
हेही वाचा>> “नाटू नाटूला माझ्यामुळे ऑस्कर मिळाला” अजय देवगणचं ‘द कपिल शर्मा’ शोमध्ये वक्तव्य, म्हणाला…
लता यांनी त्यांच्या इन्स्टाग्राम अकाऊंटवरुन एक पोस्ट शेअर केली आहे. या पोस्टमध्ये त्यांनी आजाराबाबत माहिती देत चाहत्यांना प्रार्थना करण्याचं आवाहन केलं आहे. “घशाच्या आजारासाठी मी नुकतीच ENT(कान नाक व घसा) तज्ज्ञांची भेट घेतली. माझ्या घशात गाठ आली आहे. यातून बरे होण्यासाठी मला एक आठवडा आराम करावा लागणार आहे. यासाठी मी औषधे घेत आहे. हा एकमेव उपाय आहे. योग्य काळजी घेतली नाही तर माझा आवाजही जाऊ शकतो”, असं लता यांनी पोस्टमध्ये म्हटलं आहे.
हेही वाचा>> Video: “हृदयी वसंत फुलताना…” गाण्यावर सचिन-सुप्रिया यांचा रोमँटिक डान्स, व्हिडीओ व्हायरल
लता सबरवाल यांच्या पोस्टवर चाहत्यांनी कमेंट करत काळजी व्यक्त केली आहे. अनेक कलाकारांनीही कमेंट करत प्रार्थना करत असल्याचं म्हटलं आहे.
