मराठी मनोरंजन विश्वात मानाच्या समजल्या जाणाऱ्या ‘झी चित्र गौरव’ पुरस्कार सोहळ्याला यंदा राज्याचे उपमुख्यमंत्री अजित पवार यांनी खास उपस्थिती लावली होती. हा भव्य कार्यक्रम नुकताच पार पडला. या पुरस्कार सोहळ्यात अवधूत गुप्तेंनी उपमुख्यमंत्र्यांची मुलाखत घेतली.
पुरस्कार सोहळ्यात उपमुख्यमंत्री अजित पवार यांनी अवधूत गुप्तेंनी विचारलेल्या प्रश्नांना अतिशय खुमासदारपणे आणि मनोरंजकपणे उत्तरं दिली. या कार्यक्रमात त्यांनी काही जुन्या आठवणींना देखील उजाळा दिला. चित्रपटांच्या आवडीविषयी सांगताना अजित पवार म्हणाले, “मी जास्त चित्रपट पाहत नाही. पण कॉलेजच्या काळात मला अमिताभ बच्चन आवडायचे, नंतरच्या काळात शाहरुख खान आला, त्यामुळे वयानुसार आवड बदलत असते.”
अवधूत गुप्तेंनी पुढे, “तुमच्यावर बायोपिक आला, तर कोणत्या अभिनेत्याने भूमिका करावी?” असा प्रश्न अजित पवारांना विचारला. यावर त्यांनी ‘चला हवा येऊ द्या’चा सूत्रसंचालक डॉक्टर निलेश साबळेचं नाव घेतलं. यानंतर निलेशने अजित पवारांची मिमिक्री देखील करून दाखवली.
हेही वाचा : Oscars 2024 : भारतीय सिनेप्रेमींना लाइव्ह पाहता येणार ऑस्कर सोहळा! कधी व कुठे जाणून घ्या…
दरम्यान, ‘झी चित्र गौरव २०२४’ या पुरस्कार सोहळ्याचं प्रक्षेपण ‘झी मराठी’ वाहिनीवर शनिवार १६ मार्च रोजी सायंकाळी ७ वाजता झी मराठी वाहिनीवर करण्यात येणार आहे. यंदा या कार्यक्रमाला सारा अली खान आणि शिल्पा शेट्टी या बॉलीवूड अभिनेत्री देखील उपस्थित होत्या.
