झी मराठी वाहिनीवरील सर्वाधिक चर्चेत असणारी मालिका म्हणजे ‘माझी तुझी रेशीमगाठ’. या मालिकेतील कलाकारांनी अल्पावधीतच प्रेक्षकांच्या मनावर अधिराज्य गाजवलं. प्रार्थना बेहरे, श्रेयस तळपदे या कलाकार या मालिकेमध्ये मुख्य भूमिकेत आहेत. आता ही मालिका लवकरच प्रेक्षकांचा निरोप घेणार असल्याची चर्चा सुरू झाली आहे.
आणखी वाचा – “अम्मा तुम्ही माझ्यासाठी…” शिझान खानच्या आईसाठी तुनिषा शर्माने रेकॉर्ड केलेली व्हॉईस नोट व्हायरल
मध्यंतरी या मालिकेमध्ये नेहा (प्रार्थना बेहरे) या पात्राचा अपघात झाला असल्याचं दाखवण्यात आलं. मालिकेत मोठा ट्विस्ट आल्यानंतर प्रेक्षकांनी ‘माझी तुझी रेशीमगाठ’वर नाराजी व्यक्त केली. नेहा या पात्राने पुन्हा मालिकेत एण्ट्री केली असली तरी या पात्राची जागा अनुष्का या पात्राने घेतली होती. दरम्यान मालिकेच्या कथेला एक वेगळं वळण मिळालं.
आता प्रार्थनाने इन्स्टाग्राम स्टोरीद्वारे पोस्ट शेअर केल्याने ‘माझी तुझी रेशीमगाठ’ प्रेक्षकांचा निरोप घेणार का अशी चर्चा सुरू झाली आहे. “काहीच दिवस बाकी” असं या मालिकेतील लूक शेअर करत प्रार्थनाने म्हटलं आहे. तर मालिका संपल्यानंतर तिचे काय प्लॅन आहेत हेही तिने सांगितलं आहे.
मालिका संपल्यानंतर “सकाळी, दुपारी, संध्याकाळी, रात्री झोपणार” असं प्रार्थनाने म्हटलं आहे. तर ही पोस्ट शेअर करत मालिकेतील इतर कलाकारांनीही तिने टॅग केलं आहे. दरम्यान प्रार्थनाची ही पोस्ट पाहिल्यानंतर “मीही तुझ्या प्लॅनमध्ये सहभागी होणार” असं या मालिकेतील अभिनेत्री काजल काटेने म्हटलं आहे. पण खरंच ‘माझी तुझी रेशीमगाठ’ बंद होणार का? याबाबत कोणतीच अधिकृत घोषणा करण्यात आलेली नाही.
