‘खुपते तिथे गुप्ते’ हा छोट्या पडद्यावरील अत्यंत गाजलेला कार्यक्रम आहे. या कार्यक्रमाची दोन पर्वे यशस्वीपणे पूर्ण केल्यानंतर अनेक वर्षांनी आता हा कार्यक्रम पुन्हा एकदा प्रेक्षकांच्या भेटीला येत आहे. या कार्यक्रमाचे तिसरे पर्व ४ जूनपासून सुरू होत आहे. या कार्यक्रमाचे वेगवेगळे प्रोमो सध्या व्हायरल होत आहेत. अशातच राज ठाकरे यांच्या या कार्यक्रमातील एका प्रोमोने सर्वांचे लक्ष वेधले आहे.
महाराष्ट्र नवनिर्माण सेनेचे अध्यक्ष राज ठाकरे ‘खुपते तिथे गुप्ते – ३’च्या पहिल्या भागात पाहुणे म्हणून हजेरी लावणार आहेत. काही दिवसांपूर्वीच त्यांची या कार्यक्रमातील पहिली झलक समोर आली. तर त्या पाठोपाठ त्यांचा प्रोमो आता समोर आला आहे. या प्रोमोमध्ये ते जुने फोटो पाहून भावुक झालेले दिसत आहेत.
‘झी मराठी’च्या सोशल मीडिया अकाउंटवरून या एपिसोडचा प्रोमो प्रदर्शित करण्यात आला. यामध्ये अवधूत गुप्ते राज ठाकरेंना काही जुने फोटो दाखवताना दिसत आहे. या फोटोंमध्ये बाळासाहेब ठाकरे, उद्धव ठाकरे आणि राज ठाकरे आहेत. त्यांच्यातला जिव्हाळा या फोटोंमध्ये दिसून येत आहे. हे फोटो दाखवल्यावर अवधूत गुप्तेने त्यांना विचारले की, “काय वाटतं हे सगळं एकत्र पाहून?” यावर राज ठाकरे म्हणाले, “खूप छान दिवस होते ते. माहीत नाही मला.. कोणीतरी विष कालवलं किंवा नजर लागली.” यावर अवधूत म्हणाला, “आता परत येऊ नाही शकणार…” हा प्रोमो आता चांगलाच चर्चेत आला आहे.
दरम्यान, या कार्यक्रमाचे हे नवे पर्व ४ जूनपासून प्रेक्षकांच्या भेटीला येत आहे. हा प्रोमो पाहिल्यावर प्रेक्षकांच्या मनातली उत्सुकता आणखी वाढलेली दिसत आहे.
