२५० क्रू मेंबर्स, ६० कलाकार अन्…; २ मालिकांच्या ‘महासंगम’साठी केली ‘अशी’ तयारी! पुण्यात ‘या’ ठिकाणी पार पडलं शूटिंग

‘लक्ष्मी निवास’ मालिकेमध्ये जयंतची भूमिका साकारत असलेला मेघन जाधव म्हणाला, “जेव्हा आम्ही ते भव्य महाल पाहिले आणि आम्हाला कळलं की, या महालात आपण ‘पारू’ आणि ‘लक्ष्मी निवास’चं भव्य मंगलकार्य शूट करत आहोत तेव्हा आम्ही सर्वजण अगदी भारावून गेलो होतो. या महालात आता पर्यंत मोठे-मोठे हिंदी सिनेमे, वेब सीरिज आणि जाहिरातींचं चित्रीकरण झालं आहे. पण, पहिल्यांदाच एका मालिकेचं आणि ते ही मराठी मालिकेचं याठिकाणी शूट होत आहे. या महालाचा लूक एकदम राजस्थानच्या राजवाड्यांसारखा आहे आणि तो बघताना आपण काहीतरी अद्वितिय पाहत आहोत असं वाटतं. यासाठी तुम्हाला कुठेही बाहेर जायची गरज नाही हा महाल आपल्या पुण्यातच आहे. यासाठी संपूर्ण ‘झी मराठी’ वाहिनीची टीम, क्रिएटिव्ह टीम आणि प्रोडकशन टीमचं आम्हाला सर्वांना कौतुक आहे.”

अभिनेता पुढे म्हणाला, “मला आऊटडोअर शूट करायला खूप आवडतं. आमचं शूट सुरु असताना पूर्ण टीम सगळ्या गोष्टी परफेक्ट करण्याचा पूर्ण प्रयत्न करत होती. आम्ही महासंगमसाठी हेलिकॉप्टरमध्ये सुद्धा शूट केलं. तर ही एवढी रॉयल्टी तुम्हाला तुमच्या आवडत्या मालिकांमध्ये बघायला मिळणार याहून छान गोष्ट काय असणार… २५० हून जास्त क्रू मेंबर्स होते आणि सगळेजण वेगवेगळ्या युनिटमध्ये काम करत होते. जेव्हा शूट सुरु झालं तेव्हा वाटतच नव्हतं की, कुठच्या मालिकेचं शूट होत आहे असं वाटत होत एका भव्य सिनेमाचं शूट सुरु आहे. कारण दीड तासांचा एपिसोड ६ दिवस प्रेक्षकांसाठी आणायचा ही खूप मोठी गोष्ट आहे”

“नंद महाल हा पॅलेस सिंहगड किल्ल्याजवळ आहे. त्यामुळे आम्ही सह्याद्रीच्या पर्वतरांगा पाहू शकतो, इकडचे खास पदार्थ मागवतो आणि रात्री आम्ही चांदण्या पाहतो जे मुंबईत करता येत नाही, काम आणि मज्जा दोन्ही गोष्टी आम्ही इथे अनुभवतोय. आम्ही दोन्ही मालिकांचे ५० ते ६० कलाकार रोज एकत्र बसून जेवतो. हा सेट माझ्या कायम लक्षणात राहणार” असं मेघनने सांगितलं.

दरम्यान, ‘पारू’ आणि ‘लक्ष्मी निवास’ या दोन्ही मालिकांचा महासंगम १ फेब्रुवारीपर्यंत रंगणार आहे. आता जयंत-जान्हवीचं लग्न आणि आदित्य-अनुष्काचा साखरपुडा निर्विघ्नपणे पार पडणार की नाही हे मालिकेच्या आगामी भागात प्रेक्षकांना पाहायला मिळेल.