बॉलिवूड अभिनेत्री प्रियांका चोप्रा आणि अमेरिकन गायक निक जोनास यांच्या लग्नाला महिन्याभराचा अवधी उलटला. हे ‘बिग फॅट इंडियन वेडिंग’ या ना त्या कारणानं चर्चेत होतं. त्यातूनच ‘जुता छुपाई’साठी प्रियांकाची बहिण परिणीती चोप्रानं निककडून तब्बल ३७ कोटी मागितले होते. चित्रपटाच्या प्रमोशनदरम्यान मी निककडून ‘जुता छुपाई’ बदल्यात एवढी मोठी रक्कम मागितली आणि निक हसत तयारही झाला असल्याचं परिणीती गंमतीनं म्हणाली होती. निकनं तिला ३७ कोटी जरी दिले नसले तरी एक खास भेटवस्तू मात्र आवर्जून दिली होती. महिनाभरानंतर परिणीतीनं निकनं दिलेली ती मौल्यवान भेट काय होती याचा खुलास केला आहे.
एका मुलाखतीत तिला याबद्दल विचारलं होतं. त्यावेळी निकनं आम्हाला हिऱ्याची अंगठी दिल्याचं ती म्हणाली. ‘जुता छुपाई’च्या खेळात आम्ही निककडून मोठी रक्कम घेण्याचं ठरवलं होतं. पण निकनं पैशांपेक्षाही मौल्यवान आणि लक्षात राहिल अशी भेट आमच्यासाठी आणली. त्यानं प्रत्येक बाइडमेड्ससाठी हिऱ्याची अंगठी आणली होती असं परिणीती या मुलाखतीत म्हणाली.
प्रियांका आणि निक १ आणि २ डिसेंबरला विवाहबंधनात अडकले होते. जोधपुरमधल्या उमेद भवन पॅलेसमध्ये या दोघांचा ख्रिश्चन आणि पारंपरिक भारतीय पद्धतीनं विवाहसोहळा पार पडला.
