आर्ची आणि परश्याची प्रेमकथा सध्या राज्याच्या कानाकोपऱ्यांमधील चित्रपटगृहांतून धुमाकूळ घालते आहे. नागराज मंजूळे दिग्दर्शित चित्रपटाला राज्यभरातील प्रेक्षकांकडूनही ‘सैराट’ प्रतिसाद मिळत असल्याने तिसऱ्या आठवडय़ापर्यंत सगळीकडे हाऊसफुल्लची पाटी झळक ते आहे. ‘सैराट’च्या तिकीटबारीवरील या यशाचा तडाखा इतका जोरदार आहे की सुट्टीचे गणित आखून जे मराठी चित्रपट मे महिन्यात प्रदर्शित होणार होते त्यांचेही धाबे दणाणले आहेत. मे महिन्याच्या पहिल्या दोन आठवडय़ात प्रदर्शित होणारे तीन मराठी चित्रपटांचे प्रदर्शन पुढे ढकलण्यात आले आहे.
एप्रिलच्या शेवटच्या आठवडय़ात ‘सैराट’ प्रदर्शित झाला. पहिल्याच आठवडय़ात या चित्रपटाने तिकीटबारीवरील कमाईचा २५ कोटींचा आकडा पार केला होता. तर दुसऱ्या आठवडय़ात चित्रपटाने ३५ कोटींचा आकडाही पार केला आहे. प्रदर्शनाआधीच गाजलेली गाणी आणि एकूणच चित्रपटाची हवा पाहता हा चित्रपट दोन आठवडे गाजणार हा ट्रेड विश्लेषकांचाही अंदाज होता. त्यामुळे मे महिन्याच्या पहिल्या आठवडय़ात कोणताही दुसरा मराठी चित्रपट प्रदर्शित झाला नव्हता. मात्र दुसऱ्या आठवडय़ात अजय फणसेकर दिग्दर्शित ‘चीटर’ आणि जॉजी रेशल जॉब दिग्दर्शित ‘पैसा पैसा’ हे दोन चित्रपट प्रदर्शित होणार होते. तर तिसऱ्या आठवडय़ात प्रथमेश परबची मुख्य भूमिका असलेला ‘३५ टक्के काठावर पास’ हा बहुचर्चित चित्रपट प्रदर्शित होणार होता. पण ‘सैराट’साठी या आठवडय़ातील शनिवार-रविवापर्यंत चित्रपटगृहातील शो हाऊसफुल्ल असल्याने अन्य मराठी चित्रपटांना चित्रपटगृहे मिळवण्यातच अडचणी निर्माण झाल्या आहेत.
‘सैराट’ पहिल्या आठवडय़ात ४०० चित्रपटगृहांमधून प्रदर्शित झाला. आठवडय़ाला ९ हजार शो दाखवण्यात येत होते. आता ४५६ चित्रपटगृहांमधून आठवडय़ाला १३ हजार शो दाखवले जात असून, तरीही हाऊसफुल्लची पाटी लागली आहे.
‘लय भारी’, ‘नटसम्राट’ आणि आता ‘सैराट’ या तिन्ही चित्रपटांचा जॉनर वेगवेगळा आहे. मात्र या तिन्ही चित्रपटांना प्रेक्षकांनी त्या त्या पध्दतीने भरभरून प्रतिसाद दिला. आपले प्रेक्षक किती प्रगल्भ आहेत, हे या प्रतिसादावरून लक्षात येते. ‘सैराट’ वरवर प्रेमकथा वाटत असली तरी तो गंभीर विषय आहे आणि तीन तासांची मांडणी असलेल्या या प्रवाही चित्रपटाला प्रेक्षकांनी आपलेसे केले याबद्दल त्यांना सलाम आहे. लवकरच हा चित्रपट ‘नटसम्राट’चा विक्रम मोडून नंबर वन ठरेल.
निखिल साने, निर्माते
