‘वेड’ या चित्रपटात महत्त्वपूर्ण भूमिका साकारत मराठी प्रेक्षकांच्या परिचयाची झालेली अभिनेत्री म्हणजे जिया शंकर. वेड चित्रपटातील तिचं काम सर्वांनाच आवडलं. तर त्यानंतर ती ‘बिग बॉस ओटीटी’च्या दुसऱ्या पर्वामध्ये स्पर्धक म्हणून सहभागी झाली होती. नुकताच या पर्वातील तिचा प्रवास संपला. तर बिग बॉसच्या घरातून बाहेर पडताच तिने स्वतःला एक मोठी भेट दिली आहे.
अभिनेत्री जिया शंकर हिचा चाहता वर्ग खूप मोठा आहे. ती सोशल मीडियावर सक्रिय राहून तिच्या आयुष्यात घडणाऱ्या घडामोडी चाहत्यांशी शेअर करत असते. ‘बिग बॉस’मध्येही ती तिच्या वागणुकीमुळे खूप चर्चेत होती. तर नुकतीच ती या स्पर्धेतून एलिमिनेट झाली.
‘बिग बॉस ओटीटी २’मधून बाहेर पडल्यावर आता तिने स्वतःला एक महागडी भेट दिली आहे. तिने स्वतःसाठी नवी कोरी बीएमडब्ल्यू गाडी खरेदी केली आहे. ही गाडी विकत घेतानाचा तिचा एक व्हिडीओ सध्या खूप व्हायरल होत आहे. यामध्ये ती ‘हर हर महादेव’ म्हणत नारळ फोडते. त्यानंतर तिची आई फुलांनी सजवलेले आरतीचे ताट आणते आणि बोनटला हार घालून तिची पूजा करते. पूजेनंतर जियाने पेढे देत पापाराझींचंही तोंड गोड केलं.
हेही वाचा : अनिल कपूर आणि त्यांची पत्नी सुनिता कपूर यांनी नातवाला दिली ‘ही’ खास भेट
जियाने खरेदी केलेली ही गाडी गडद निळ्या रंगाची आहे. तिने खरेदी केलेलं हे मॉडेल BMW X1 आहे. या गाडीची किंमत ४० ते ५० लाख असल्याचं बोललं जात आहे.
