Viral Video: बजरंग दलाच्या कार्यकर्त्यांनी अडवला रणबीर, आलियाचा रस्ता; बीफसंदर्भातील विधानामुळे महाकाल मंदिराबाहेर गोंधळ

पोलीस काय म्हणाले?
“काही व्हीआयपी लोक मंदिरामध्ये येणार असल्याने आम्ही सुरक्षा व्यवस्था तैनात करत होतो. त्याचवेळी काही लोकांनी मंदिराला भेट देणाऱ्या या सेलिब्रिटींविरोधात आंदोलन करण्यास सुरुवात केली. त्याचवेळी एकजण पोलीस अधिकाऱ्याशी हुज्जत घालू लागला,” असं मिश्रा यांनी एएनआयशी बोलताना सांगितलं.

व्हायरल व्हिडीओत काय?
व्हायरल व्हिडीओमध्ये बजरंग दलाचे कार्यकर्ते शांततापूर्ण आंदोलन करत रणबीर आणि आलियाला काळे झेंडे दाखवताना दिसत आहे. मात्र पोलिसांनी या लोकांविरोधात कारवाई सुरु केली. “आम्ही रणबीरविरोधात आंदोलन करत आहोत आणि त्याला आम्ही महाकाल मंदिरात प्रवेस करुन देणार नाही. त्याने आमच्या गोमातेविरोधात विधान केलं आहे. बिफ खाणं योग्य असल्याचं तो म्हणाला आहे,” असं आंदोलकांपैकी एकजण सांगताना दिसत आहे.

गुन्हा दाखल
बजरंग दलाचे कार्यकर्ते ‘जय श्री राम’च्या घोषणा देत होते. आलिया आणि रणबीर दर्शनासाठी आल्यानंतर घोषणांचा आवाज वाढल्याचं पीटीआयने दिलेल्या वृत्तात म्हटलंय. या प्रकरणामध्ये पोलिसांनी कलम ३५३ अंतर्गत गुन्हा दाखल केला. सरकारी कर्मचाऱ्याच्या कामामध्ये अडथळा निर्माण करण्याचा प्रयत्न केल्याच्या आरोपाअंतर्गत हा गुन्हा दाखल करण्यात आला आहे.

आर्यन मुखर्जीने घेतलं दर्शन
रणबीर आणि आलिया हे त्यांच्या ‘ब्रम्हास्त्र’ या बहुप्रतीक्षित चित्रपटाच्या प्रमोशननिमित्त देशातील वेगवेगळ्या भागांमध्ये फिरत आहेत. दिग्दर्शक आर्यन मुखर्जीने महाकाल मंदिरामध्ये देवाचं दर्शन घेतल्याची माहिती येथील पुराजी आशिष पुजारी यांनी पीटीआयशी बोलताना दिली.

रणबीर काय म्हणाला होता?
२०११ मध्ये रणबरीने रॉकस्टार चित्रपटाच्या प्रमोशनच्या वेळी आपल्याला बीफ खायला आवडतं असं म्हटलं होतं. “माझं कुटुंब पेशावरचं आहे. त्यामुळे त्यांच्यासोबत पेशावरी खाद्यसंस्कृतीही इथे आली आहे. मी मटण, पायाही खातो. मी बीफचा चाहता आहे. मी बीफचा मोठा चाहता आहे,” असं रणबीर म्हणाला होता. ब्रमास्त्र चित्रपटाच्या पार्श्वभूमीवर हा जुना व्हिडीओ पुन्हा व्हायरल झाला आहे.