“दगडाचा तुकडा घरात…”, विजय देवरकोंडाने पहिल्या फिल्मफेअर पुरस्काराचा २५ लाख रुपयांत केलेला लिलाव

अभिनयासाठी मिळालेल्या पहिल्या फिल्मफेअर पुरस्काराचा त्याने लिलाव केला होता, असं विजय देवरकोंडाने सांगितलं. त्याने हे पैसे दान केले होते आणि ती आयुष्यातील एक चांगली आठवण आहे, असंही तो म्हणाला. “मला प्रमाणपत्रं आणि पुरस्कारांमध्ये फारसा रस नाही. काही पुरस्कार माझ्या ऑफिसमध्ये असतील तर काही माझ्या आईने कुठेतरी ठेवले असतील. मी काही पुरस्कार दुसऱ्यांना दिले. त्यातला एक पुरस्कार मी संदीप रेड्डी वांगा यांना दिला होता,” असं गॅलाटा प्लसला दिलेल्या मुलाखतीत विजय म्हणाला.

दोन दिवस जया बच्चन व मुलांशी बोलले नव्हते अमिताभ बच्चन, ‘त्या’ चित्रपटाच्या सेटवर असं काय घडलं होतं? जाणून घ्या

विजय म्हणाला, “मला मिळालेल्या फिल्मफेअर सर्वोत्कृष्ट अभिनेत्याच्या पहिल्या पुरस्काराचा मी लिलाव केला होता, त्यातून आम्हाला चांगले पैसे मिळाले होते. मला वाटतं दगडाचा तुकडा घरात ठेवण्यापेक्षा ही माझ्यासाठी चांगली आठवण आहे.” विजयने मुख्यमंत्री सहायता निधीमध्ये हे पैसे दान केले होते. विजयने नुकतीच दिलेली मुलाखत चर्चेत आहे. यामध्ये त्याने लग्न करून बाबा व्हायचं आहे, असं म्हटलं होतं. विजय रश्मिका मंदानाला डेट करत असल्याची चर्चा आहे, पण दोघांनीही याबाबत कधीच अधिकृत माहिती दिलेली नाही.

विजय देवरकोंडाच्या कामाबद्दल बोलायचं झाल्यास लवकरच तो ‘फॅमिली स्टार’ चित्रपटाच्या माध्यमातून प्रेक्षकांच्या भेटीला येणार आहे. यात विजयबरोबर अभिनेत्री मृणाल ठाकूर मुख्य भूमिकेत आहे.