डॉ. सलील कुलकर्णी दिग्दर्शित वेडिंगचा शिनेमा या चित्रपटाची सध्या चांगलीच चर्चा रंगली आहे. धमाल कॉमेडी असलेला हा चित्रपट १२ एप्रिल रोजी प्रेक्षकांच्या भेटीला येणार आहे. उत्तम कथा, दर्जेदार अभिनय, खुमासदार संवाद आणि विनोदाची मस्त फोडणी या साऱ्यांचा भरणा असलेल्या चित्रपटाचा ट्रेलर नुकताच प्रदर्शित झाला आहे. हा ट्रेलर पाहिल्यानंतर चित्रपटाविषयीची उत्सुकता आणखीनच वाढली आहे.
पारंपारिक रितीरिवाजांपासून आधुनिक फॅशन-तऱ्हा आणि पद्धती यांचा मिलाफ आणि त्यातून भरपूर कौटुंबिक मनोरंजन देणारा बहुचर्चित ‘वेडिंगचा शिनेमा’ १२ एप्रिल रोजी संपूर्ण महाराष्ट्रात प्रदर्शित होत आहे. यापूर्वी प्रदर्शित झालेला टीझर आणि तीन गाणी यांना रसिकांकडून भरपूर प्रतिसाद लाभला. त्यानंतर प्रदर्शित झालेल्या ट्रेलरलाही प्रेक्षकांकडून असाच प्रतिसाद मिळत आहे.
प्रदर्शित झालेल्या ट्रेलरमध्ये एका लग्नाची तयारी, त्यासाठी केले जाणारे प्री-वेडिंग चित्रिकरण, घरातील माणसांची नृत्याची तयारी, चालीरितींवरील चर्चा या गोष्टी पाहायला मिळत आहे.मुक्ता बर्वे, भाऊ कदम, शिवाजी साटम, अलका कुबल, सुनील बर्वे, अश्विनी काळसेकर, प्रवीण तरडे, संकर्षण कऱ्हाडे, प्राजक्ता हणमगर, योगिनी पोफळे हे आघाडीचे कलाकारसुद्धा या चित्रपटात आहेत. शिवराज वायचळ आणि ऋचा इनामदार ही जोडी या चित्रपटातून प्रमुख भूमिकेमध्ये दिसणार आहे.
प्रख्यात कवी संदीप खरे यांनी या चित्रपटाची गाणी लिहिली असून डॉ. सलील कुलकर्णी यांनी चित्रपटाची कथा, पटकथा, संवाद, संगीत आणि दिग्दर्शन या साऱ्याची जबाबदारी स्वीकारली आहे.
‘वेडिंगचा शिनेमा’ची प्रस्तुती एव्हरेस्ट एंटरटेन्मेंटची असून निर्मिती गेरूआ प्रॉडक्शन्स आणि पीइएसबीची आहे. एव्हरेस्ट एंटरटेन्मेंटने आतापर्यंत अनेक गाजलेले मराठी चित्रपट दिले आहेत. त्यात ‘मी शिवाजीराजे भोसले बोलतोय’, ‘मुंबई पुणे मुंबई- २’, ‘मुंबई पुणे मुंबई-३’. ‘बॉईज-२’, ‘बापजन्म’, ‘आम्ही दोघी’, ‘शिक्षणाच्या आयचा घो, ‘हापूस’, ‘आयडियाची कल्पना’, ‘तुकाराम’, ‘आजचा दिवस माझा’, ‘हॅप्पी जर्नी’, ‘कॉफी आणि बरंच काही’ आणि ‘टाइम प्लीज’ या चित्रपटांचा समावेश आहे.
