रामायणावर बेतलेल्या ‘या’ जपानी चित्रपटावर भारतात घातलेली बंदी; नेमकं कारण जाणून घ्या

रामायणावर बेतलेल्या वेगवेगळ्या कलाकृती आपल्यासमोर आजवर आलेल्या आहेत. नुकतंच गेल्यावर्षी ‘आदिपुरुष’ या चित्रपटामुळे निर्माण झालेला वाद तर आजही आपल्या लक्षात असेल, पण रामायणावर बेतलेल्या अशाच एका कलाकृतीवर भारतात बंदी घातली गेली होती हे तुम्हाला ठाऊक आहे का? भारतासह परदेशातही भरपुर रामभक्त आपल्याला पाहायला मिळतात. अशाच एका जपानच्या निर्मात्यांनी रामायणावर आधारित एक चित्रपट बनवला होता, परंतु या चित्रपटावर एकेकाळी बंदी घालण्यात आली होती.

आणखी वाचा : राम मंदिरासाठी ‘हनुमान’ चित्रपटाच्या निर्मात्यांनी दिली ‘इतक्या’ कोटींची देणगी; ट्विटर पोस्टच्या माध्यमातून दिली माहिती

जपानी दिग्दर्शक युको सको १९८३ साली भारत दौऱ्यावर आले होते अन् त्याचवेळी त्यांना रामायणाबद्दल माहिती मिळाली. त्यांनी रामायणाची वेगवेगळी १० व्हर्जन्स वाचली व त्यांचा अभ्यास करून मगच त्यावर चित्रपट बनवायचा निर्णय त्यांनी घेतला अन् ‘रामायण-द लीजेंड ऑफ प्रिन्स रामा’ हा जपानी अॅनीमेटेड चित्रपट प्रेक्षकांच्या भेटीला आला. त्यावेळी विश्व हिंदू परषदेकडून या चित्रपटाला जबरदस्त विरोध झाला होता. देवाला कार्टून स्वरूपात सादर करण्यावर त्यांनी आक्षेप नोंदवला होता.

या चित्रपटामुळे कोणत्याही भारतीयाची भावना दुखावली जाणार नाही असे आश्वासन अखेर खुद्द दिग्दर्शकाने दिल्यावर या चित्रपटाला प्रदर्शनाची परवानगी देण्यात आली. हा एक बिग बजेट चित्रपट होता. रामानंद सागर यांच्या रामायणात रामाची भूमिका निभावणाऱ्या अरुण गोविल यांनी ‘रामायण-द लीजेंड ऑफ प्रिन्स रामा’मधील प्रमुख भूमिकेला आवाज दिला होता. हा चित्रपट पूर्णपणे तयार झाला अन् त्याचदरम्यान बाबरी मशिदीवरुन देशभरात वाद पेटला अन् युको सको यांच्या चित्रपटाच्या प्रदर्शनात आणखी एक अडथळा निर्माण झाला.

आणखी वाचा : “कित्येक पिढ्यांनी…” राम मंदिर प्रतिष्ठापना सोहळ्याविषयी व्यक्त होताना अभिनेते मनोज जोशी भावुक

देशाचे प्रधानमंत्री नरेंद्र मोदी यांच्या सहाय्याने नंतर हा चित्रपट भारतात प्रदर्शित करण्यात आला. २०२२ मध्ये पंतप्रधानांनी युगो सको यांची भेट घेतली अन् त्यांच्या या चित्रपटाला प्रदर्शनाची परवानगीही दिली. जपानी भाषेसह हा चित्रपट इंग्रजी व हिंदी अशा दोन्ही भाषांमध्ये उपलब्ध आहे. ‘आदिपुरुष’वर जबरदस्त टीका झाल्यानंतर या जपानी रामायणाचे बरेच संदर्भ आपल्याला सोशल मीडियावर पाहायला मिळाले. गेल्या काही दिवसांत या चित्रपटाची जबरदस्त क्रेझ आपल्याला पाहायला मिळत आहे. प्रेक्षकांनाही हे रामायण प्रचंड आवडले आहे.