‘लोकसत्ता लोकांकिके’चा अर्ज सादर करण्याची अंतिम तारीख १५ सप्टेंबर; २९ सप्टेंबरपासून प्राथमिक फेरी सुरू

आली नाटय़घटिका समीप..!
शंभराहून अधिक वर्षांची परंपरा लाभलेल्या मराठी नाटय़सृष्टीला नवनवीन कलाकारांची ओळख करून देणाऱ्या आणि राज्यभरातील नाटय़वेडय़ा महाविद्यालयीन तरुणांना हक्काचे व्यासपीठ मिळवून देणाऱ्या ‘लोकसत्ता लोकांकिका’ या स्पर्धेचे पडघम वाजू लागले आहेत. सॉफ्ट कॉर्नर प्रस्तुत लोकसत्ता लोकांकिका या स्पर्धेसाठी अर्ज भरण्याची अंतिम तारीख जाहीर झाली असून राज्यभरात १५ सप्टेंबपर्यंत या स्पर्धेचे अर्ज स्वीकारले जातील. त्यानंतर २९ सप्टेंबर रोजी औरंगाबाद केंद्रापासून या स्पर्धेची प्राथमिक फेरी सुरू होणार आहे.
सॉफ्ट कॉर्नर प्रस्तुत आणि पृथ्वी एडिफीस यांच्या सहकार्याने होणाऱ्या ‘लोकसत्ता लोकांकिका’ या स्पर्धेसाठी गेल्या वर्षी तब्बल २००हून अधिक महाविद्यालयांनी आपला अर्ज सादर केला होता. अस्तित्व या संस्थेच्या सहकार्याने होणाऱ्या या स्पर्धेतील कलाकारांचे कलागुण जोखून त्यांना विविध मालिका-चित्रपट-नाटके यांचे कोंदण देण्यासाठी आयरिस प्रॉडक्शन्स हे टॅलेण्ट पार्टनर म्हणून काम पाहणार आहेत. त्याशिवाय यंदा प्राथमिक फेरीसाठी रेड एफएम ९३.५ रेडिओ पार्टनर म्हणून सहभागी झाले आहेत. तसेच झी मराठी नक्षत्र हे टेलिव्हिजन पार्टनर म्हणून आणि स्टडी सर्कल नॉलेज पार्टनर म्हणून काम पाहणार आहेत.