लोकसत्ता खास प्रतिनिधी
मुंबई : पंजाबमध्ये कट रचून दहशतवादी कारवाया केल्याप्रकरणी राष्ट्रीय तपास संस्थेने (एनआयए) जितंदर सिंह ऊर्फ ज्योति याला सोमवारी अटक केली होती. पण मुंबईत अटक होण्यापूर्वी तो दिल्ली व लखनऊ येथे वास्तव्याला होता. जुलै महिन्यात त्याचे नाव शस्त्रास्त्र प्रकरणात आल्यानंतर त्याने मुंबई गाठल्याचे तपासात उघड झाले आहे.
आरोपी मूळचा पंजाबमधील गुरूदासपूर येथील रहिवासी असून खलिस्तान दहशतवादी लखबीर सिंह ऊर्फ लांडा आणि गँगस्टर बचितर सिंह ऊर्फ पवित्र बाटला यांच्या विश्वासू साथीदार आहे. आरोपी बब्बर खालसासाठी शस्त्रास्त्रे वितरणाचे काम करीत होता. पण ओळख लपवण्यासाठी सुरूवातीला दिल्ली व त्यानंतर लखनऊमध्ये क्रेन ऑपरेटर म्हणून काम करायचा. याप्रकरणी जुलै, २०२४ मध्ये बलजीत सिंह ऊर्फ राणा भाईला अटक झाली होती. तेव्हा आरोपी जतिंदरचा याप्रकरणातील सहभाग उघड झाला होता. त्यानंतर त्याने मुंबई गाठली व तो मानखुर्द परिसरात राहू लागला. यापूर्वीही २००८ मध्ये त्याने मुंबईत क्रेन ऑपरेटर म्हणून काम केले आहे. त्यामुळेच शस्त्रास्त्र प्रकरणात त्याचे नाव आल्यानंतर त्याने मुंबई गाठली. यापूर्वी त्याने मुंबईत काम केल्यामुळे मुंबईतील विविध परिसराची माहिती होती, असे चौकशीत समजले आहे.
आणखी वाचा-गतिमंद मुलीवरील बलात्कार प्रकरण : ७३ वर्षांच्या दोषसिद्ध आरोपीला जामीन नाहीच
एनआयएच्या तपासानुसार, जतिंदर हा बंदी घातलेल्या बब्बर खालसा (आंतरराष्ट्रीय) या दहशतवादी संघटनेशी संबंधित आहे. अटक आरोपी जतिंदर हा पवित्र बाटला याचा विश्वासू मानला जातो. तो संघटनेसाठी पंजाबमध्ये शस्त्रांचे वितरण करण्याचे काम करीत होता, असा आरोप आहे. जतिंदर सिंहने मध्य प्रदेशातून शस्त्र पुरवठादार बलजित सिंह ऊर्फ राणाभाईकडून दहा पिस्तुले आणली होती. ती पंजाबमधील संघटनेशी संबंधित व्यक्तींना पुरवली होती. त्यामुळे त्याची अटक देशाच्या सुरक्षेच्या दृष्टीने महत्त्वाची मानली जात आहे.
