लोकसत्ता खास प्रतिनिधी मुंबई : आई मद्यधुंद अवस्थेत असताना पित्याने १३ वर्षांच्या मुलीवर अत्याचार केल्याचा खळबळजनक प्रकार मुंबईत घडला. पीडित मुलीने हा प्रकार मावशीला सांगितल्यानंतर तिने पोलिसांकडे तक्रार केली. पोलिसांनी पीडित मुलीच्या वडिलांविरोधात पोलिसांनी गुन्हा दाखल केला आहे. मुंबईमधील पश्चिम उपनगरात कुटुंबासमवेत वास्तव्यास असलेल्या १३ वर्षांच्या मुलीवर वडिलांनीच २७ जुलै रोजी अत्याचार केला. आरोपीने पत्नीला दारू पाजली. दारू सेवनामुळे तिची शुद्ध हरपली. त्यानंतर पित्याने पीडित मुलीवर अत्याचार केला. त्यानंतर आरोपीने पीडित मुलीला हा प्रकार कोणालाही सांगितल्यास ठार मारण्याची धमकी दिली. त्यामुळे मुलगी घाबरली होती. पण पीडित मुलीने काही दिवसानंतर तिच्या मावशीला घडलेला प्रकार सांगितला. आणखी वाचा- मतदान केंद्रांच्या संख्येत वाढ होणार; हजार-बाराशे मतदारांमागे एक मतदान केंद्र मावशीने याप्रकरणी पोलिसांकडे तक्रार केली. त्यानुसार पोलिसांनी याप्रकरणी बालकांचे लैंगिक अपराधापासून संरक्षण कायद्याअंतर्गत (पोक्सो) आरोपी पित्याविरोधात गुन्हा दाखल केला. याप्रकरणी पोलीस अधिक तपास करीत आहेत.
