‘लालबागचा राजा’ परिसरात चार दिवसात १३५ मोबाइल लंपास

नवसाला पावणारा गणपती म्हणून ‘लालबागच्या राजा’ची ख्याती आहेत. याच कारणासाठी दरवर्षी राजाच्या दर्शनला भाविकांची मोठी रिघ लागते. याच गर्दीचा फायदा घेत चोरटे हात साफ करताना दिसत आहेत. ‘लालबागचा राजा’ परिसरातील काळाचौकी पोलिस स्थानकात चार दिवसांत १३५ मोबाईल चोरीच्या तक्रारी नोंदवल्या गेल्या असल्याचे वृत्त ‘एबीपी माझा’ या वृत्तवाहिनीने दिले आहे.

मुंबईमधील लालबाग, परळ भागातील गणेशोत्सवाची ख्याती जगभरात आहे. या भागामध्ये अनेक लोकप्रिय आणि मोठी गणेश मंडळे असून दरवर्षी गणरायांच्या मोठ्या मुर्ती पाहण्यासाठी हजारो भाविक दहा दिवसांच्या कालावधीमध्ये या परिसराला भेट देतात. म्हणूनच सुरक्षेसाठी पोलिसांचा या परिसरात चोख बंदोबस्त असतो. मागील काही वर्षांपासून या परिसरावर नजर ठेवण्यासाठी पोलिसांकडून सीसीटीव्ही कॅमेरांचाही वापर केला जात आहे. इतक्या उपाययोजना करुनही भुरटे चोर गर्दीचा फायदा घेऊन मौल्यावन वस्तूंवर हात साफ करताना दिसत आहेत. मागील काही वर्षांमध्ये गणेशोत्सव काळात या परिसरात होणाऱ्या चोऱ्यांची आकडेवारी पाहता येथे सुरत गँग आणि यूपी गँग या दोन टोळ्या कार्यरत असल्याची शक्यता व्यक्त केली जात आहे.