मुंबईहून नवी मुंबईत येणाऱ्या टॅक्सीला मुंबईकडे जाणाऱ्या ५०१ क्रमांकाच्या बेस्ट बसने दिलेल्या जोरदार धडकेमुळे टॅक्सीचालकासह एक नऊ वर्षांची चिमुरडी जागीच ठार झाली तर टॅक्सीतील इतर सहा जण जखमी झाले. त्यातील एकाची प्रकृती गंभीर आहे. मंगळवारी वाशी खाडीपूलावर हा अपघात झाला. या अपघातात टॅक्सीचालक कृष्णकुमार व मनिषा गुप्ता ही नऊ वर्षांची मुलगी जागीच ठार झाले तर टॅक्सीतील शैलेश गुप्ता, मंजुदेवी गुप्ता, सत्यम गुप्ता, शिवम गुप्ता, ब्रीज मोहन प्रसाद, विकास जैसवाल हे जखमी झाले असून सत्यम गुप्ता याला सायन रुग्णालयात दाखल करण्यात आले आहे. हे कुटुंब एक लग्न आटोपून घरी परतत होते. सत्यम यांची प्रकृती गंभीर आहे. इतर पाच जणांना नवी मुंबई पालिकेच्या रुग्णालयात उपचार सुरु आहेत. बेस्ट चालक विष्णू जाधव याला अटक करण्यात आली आहे.