मुंबईत विविध गुन्हयांत जामीनावर सुटलेले २६९७ आरोपी फरार असून झोपडपट्टयांच्या पुनर्विकासामुळे या आरोपींचा छडा लागत नसल्याची कुबली गृहमंत्री आर. आर. पाटील यांनी विधानसभेत दिली.
या फरारी आरोपींचा शोध घेण्यासाठी गेल्या तीन वर्षांपासून परिणामकारक मोहीम राबविण्यात येत असून २२२४ आरोपींना शोधण्यात यश आले. गेल्या सहा महिन्यात ३७३ आरोपींना पकडण्यात यश आले असून ७६ आरोपी मयत झाल्याचे आढळून आल्याची माहिती पाटील यांनी दिली. फरारी आरोपी आणि त्यांचे जामीनदार हे बहुतांश बेकादेशीर झोपडपट्टी, चाळीमध्ये राहणारे असतात. या झोपडय़ांवर महापालिकेकडून वेळोवेळी कारवाई केली जाते. तसेच बऱ्याच चाळी आणि झोपडय़ांच्या पुनर्विकास झाल्यामुळे ही घरे विकून ते अन्यत्र स्थलांतर करतात त्यामुळे आरोपींचा शोध लागत नाही. तर मोठय़ा गुन्ह्यातील आरोपी जामीनावर सुटल्यानंतर परदेशात पळून जातात त्यामुळे या आरोपींना पकडण्यात अडचणी येत असल्याचेही आर. आर. पाटील यांनी लेखी उत्तरात म्हटले आहे.
येरवडातील ५७ कैदी फरारी!
येरवडा तुरुंगातील ५७ कैदी गेल्या दहा वर्षांत पॅरोलवर असताना फरारी झाल्याची माहितीही पाटील यांनी दिली. यातील २५ टक्के कैदी हे खून, बलात्कार आणि खुनाचा प्रयत्न; अशा गंभीर गुन्ह्य़ांतील होते, असेही पाटील यांनी लेखी उत्तरात म्हटले आहे.
गृह घोटाळ्यात अधिकारी निर्दोष
राज्यातील आयपीएस अधिकाऱ्यांनी सरकारी कोटय़ातून मिळविलेली घरे भाडय़ाने देऊन ते स्वत: सरकारी निवासस्थानात राहत असल्याच्या आरोपात तथ्य नसून हे अधिकारी नियमानुसारच राहत असल्याचे गृहमंत्री आर. आर. पाटील यांनी बुधवारी विधानसभेत सांगितले. ३९ पैकी १९ आयपीएस अधिकारी स्वत:च्या मालकीची घरे असतानाही सरकारी निवासस्थानात राहात असल्याचे आढळून आले आहे. मात्र सरकारच्या नियमानुसार उपनगरात घर असले आणि तो अधिकारी मुंबईत काम करीत असेल तर त्याला सरकारी निवासस्थानात राहता येते. त्यामुळे या अधिकाऱ्यांनी घरे भाडय़ाने देण्यात काहीही गैर नसल्याचे पाटील यांनी स्पष्ट केले.
