लोकसत्ता प्रतिनिधी
मुंबई : भायखळा येथील राणीच्या बागेतील अर्थात वीरमाता जिजाबाई भोसले वनस्पती उद्यान आणि प्राणीसंग्रहालयातील पेंग्विन पक्षाच्या जोडयांना आणखी तीन पिल्ले झाली आहेत. यामध्ये दोन नर आणि एक मादी आहे. राणीच्या बागेतील पेंग्विनची संख्या आता २१ झाली आहे.
राणीच्या बागेतील हंबोल्ट पेंग्विनच्या जोड्यांनी आणखी तीन पिल्लाना जन्म दिला आहे. त्यांचे नामकरणही करण्यात आले आहे. त्यात ऑलिव्ह आणि पोपॉय या जोडीने ४ मार्चला एका नर पिल्लाला जन्म दिला असून त्याचे नाव ‘नॉडी’ ठेवण्यात आले आहे. तर डोनाल्ड आणि डेझी या जोडीने दिलेल्या अंड्यातून ७ मार्चला एक पिल्लू जन्मले असून त्याचे नाव ‘टॉम’ ठेवण्यात आले आहे. तर ११ मार्चला एक मादी पिल्लू जन्मले असून तिचे नाव ‘पिंगु’ ठेवण्यात आले आहे. ही तिन्ही पिल्ले आता प्रदर्शन कक्षात आणण्यात आली आहेत. त्यामुळे राणीच्या बागेतील पेंग्विनची एकूण संख्या २१ झाली आहे. गेल्या चार वर्षात राणीच्या बागेत ११ नवीन पेंग्विन जन्माला आले आहेत.
मुंबईच्या राणीबागेत २०१७ मध्ये दक्षिण आफ्रिकेतून ८ हंबोल्ट पेंग्विन आणण्यात आले. त्यामधील एका पेंग्विनचा त्याच वेळी मृत्यू झाला. त्यानंतर सात पेंग्विन या कक्षात होते. या पेंग्विनच्या जोड्यांना पिल्ले झाली आणि त्याचाही प्राणीसंग्रहालयाने उत्सव केला. या पेंग्विनच्या पिल्लांचे नामकरणही प्राणीसंग्रहालयाने केले. पेंग्विनची संख्या गेल्या सहा वर्षात वाढून तब्बल २१ वर गेली आहे. त्यात अकरा माद्या आणि दहा नर यांचा समावेश आहे.
खर्चात वाढ नाही…
पेंग्विन पक्षांची संख्या वाढत असली तरी त्यामुळे देखभाल खर्चात वाढ होत नसल्याचे मत प्राणी संग्रहालयातील अधिकाऱ्यांनी व्यक्त केले आहे. प्राणीसंग्रहायल व्यवस्थापनाने गेल्यावर्षी पेंग्विनच्या देखभालीसाठी तीन वर्षांकरीता कंत्राटदाराची नेमणूक केली आहे. तीन वर्षांसाठीचा अंदाजित खर्च २० कोटी १७ लाखांवर आहे.
पेंग्विन पक्षांना ठेवण्यासाठी मुंबई महापालिकेने २०१७ मध्ये विशेष कक्ष तयार केले आहेत. त्यामध्ये ठराविक तापमान राखावे लागत असल्यामुळे विशेष वातानुकुलित कक्ष आणि पेंग्विनसाठीचे अधिवास तयार केलेले आहेत. त्यामुळे त्यांच्या देखभालीचा खर्च जास्त आहे. पेंग्विनसाठी डॉक्टर, कक्षासाठी अभियंते आणि तंत्रज्ञ यांची सेवा २४ तास तीन पाळ्यांमध्ये द्यावी लागते. तसेच पेंग्विनना खाद्यपुरवठा असा सगळा खर्च यात समाविष्ट असल्याची माहिती अधिकाऱ्यांनी दिली.
पेंग्विन देऊन सिंह ….
दरम्यान, हे पेंग्विन देऊन गुजरातमधून सिंह आणण्याची योजनाही प्राणी संग्रहालयाने आखली होती. त्याकरीता प्रस्तावही पाठवला होता. मात्र गुजरातमधील जुनागढ येथील सक्करबाग प्राणी संग्रहालयाकडे पेंग्विन ठेवण्याची व्यवस्थाच नसल्यामुळे त्यांनी पालिकेच्या प्रस्तावाला काहीही प्रतिसाद दिला नाही. त्यामुळे २१ पेंग्विनची देखभाल महापालिका करीत आहे.