जुहूतील घोटाळ्यात ४० भूखंडांचा समावेश?

वास्तुरचनाकार विभागाकडून समर्थन
म्हाडा इमारतींच्या पुनर्विकासासाठी लागू असलेल्या नियमानुसार फक्त निवासी भूखंडांनाच २.५ चटईक्षेत्रफळ लागू असतानाही जुहूतील सुमारे ४० हून अधिक निवासी भूखंडांच्या जागी बांधण्यात आलेल्या व्यापारी इमारतींना आता २.५ इतके चटईक्षेत्रफळ हवे आहे. असा लाभ या परिसरातील एका खासगी रुग्णालयाला देऊन केलेल्या घोटाळ्याची चौकशी करण्याऐवजी म्हाडाचे वास्तुरचनाकार उर्वरित इमारतींना पॉइंट ५ इतके अतिरिक्त चटईक्षेत्रफळ देण्याची शिफारस करीत आहेत.
जुहूविलेपार्ले परिसराचा अभिन्यास अद्याप मंजूर झालेला नाही. असे असतानाही पॉइंट ५ या अतिरिक्त एफएसआयचा फायदा उठविता येत नसतानाही म्हाडा उच्चपदस्थांच्या ‘गृहस्वप्ना’ने पॉइंट ४ इतके अतिरिक्त चटईक्षेत्रफळ ‘रिच’वले. आता ४० भूखंडधारकांना पॉइंट ५ इतक्या अतिरिक्त चटईक्षेत्रफळाती खिरापत वाटून नव्या घोटाळ्याकडे वाटचाल करीत असल्याचे दिसून येत आहे. जुहू येथील मे. नामजोशी हेल्थकेअर प्रा. लि. ने (क्रिटी केअर) अगोदरच एक एफएसआय आणि एक टीडीआर असा लाभ उठविला होता. तरीही त्यांना अतिरिक्त पॉइंट ५ इतके चटईक्षेत्रफळ मंजूर करण्यात आले. संपूर्णपणे खासगी असलेल्या या इस्पितळावर मेहेरनजर करण्यामागे म्हाडातील एक निवृत्त मुख्य अभियंता कारणीभूत असल्याचे आढळून आले आहे.
व्यापारी इमारतींना २.५ एफएसआय लागू होत नाही, याची कल्पना असतानाही त्याकडे दुर्लक्ष करण्यात आले. आता हाच दाखला देत जेव्हीपीडी स्किम रावळ सहकारी गृहनिर्माण संस्थेने उर्वरित पॉइंट ५ इतक्या चटईक्षेत्रफळाकरीता अर्ज केला आहे. हा अर्ज सल्ल्यासाठी विधी विभागाकडे पाठविण्यात आला होता. विधी विभागाने याबाबतची संपूर्ण जबाबदारी वास्तुरचनाकार व नियोजनकार विभागाची असल्याचे म्हटले होते. त्यानुसार मुख्य वास्तुरचनाकार प्रवीण साळुंके आणि वास्तुरचनाकार अलका भिवंडकर यांनी अभिप्राय देताना तांत्रिक सल्ला देण्याऐवजी मे. नामजोशी हेल्थकेअर प्रा. लि. ला रेडी रेकनरच्या १०० टक्के दराने पॉइंट ५ इतके चटईक्षेत्रफळ देण्यास हरकत नाही, असे म्हटले आहे.
याबाबतची कागदपत्रे ‘लोकसत्ता’कडे आहेत. विकास नियंत्रण नियमावली ही फक्त निवासी भूखंडांसाठी लागू आहे. या नियमावलीत उच्च उत्पन्न गट वा व्यापारी भूखंडांचा कुठेही उल्लेख नाही. तरीही अशी मेहेरनजर दाखविण्यात आल्यामुळे आता आणखी ४० भूखंडधारक पुढे सरसावले
आहेत. जुहूतील अनिवासी जागेचा दर प्रति चौरस फूट ४० ते ६० हजार रुपये असून अशा वेळी रेडी रेकनरच्या १०० टक्के दराने अतिरिक्त चटईक्षेत्रफळ मिळणे हे या भूखंडधारकांना प्रचंड फायदेशीर ठरणार आहे. मुळात हा अतिरिक्त चटईक्षेत्रफळाचा घोटाळा रोखण्याऐवजी म्हाडाचे वास्तुरचनाकार त्याची व्याप्ती वाढवित असल्याची चर्चा आहे.