हार्बरसाठी ७२ तास ‘सीएसटी’ बंद!

फलाटांची लांबी वाढविण्यास १२, १३, १४ फेब्रुवारीला विशेष ब्लॉक
मुंबई छत्रपती शिवाजी टर्मिनस येथे हार्बर मार्गावर १२ डब्यांच्या गाडय़ांसाठी फलाटाची लांबी वाढविण्यासाठी १२, १३ आणि १४ फेब्रुवारी हे तीन दिवस विशेष ब्लॉक घेण्यात येणार आहे. या वेळात हार्बर मार्गावरील वाहतूक बंद राहणार आहे. मुख्य मार्गावरील वाहतुकीत मात्र बदल होणार नसून हार्बर मार्गावरील गाडय़ा वडाळ्यापर्यंतच धावणार आहेत.
हार्बर मार्गावरील वाढती प्रवासी संख्या लक्षात घेऊन या मार्गावर १२ डब्यांच्या गाडय़ांची योजना एमयूटीपी-२मध्ये समाविष्ट आहे. त्यासाठी या मार्गावर फलाटांची लांबी वाढवण्याचे काम गेल्या दीड-दोन वर्षांपासून मुंबई सुरू आहे. यात वडाळा आणि मुंबई छत्रपती शिवाजी टर्मिनस या दोन स्थानकांवर लांबी वाढवण्याचे आव्हान एमआरव्हीसीसमोर आहे.