मुंबई : भारतीय भौगोलिक सर्वेक्षण विभागाने मुंबईतील दरड कोसळण्याची शक्यता असलेल्या २४९ ठिकाणांचे शास्त्रोक्त पद्धतीने सर्वेक्षण केले असून सर्वेक्षणाअंती २४९ पैकी ७४ ठिकाणे अतिधोकादायक असल्याचे निदर्शनास आले आहे. या ७४ ठिकाणांच्या निकटच्या परिसरात वास्तव्यास असलेल्या रहिवाशांना मुंबई महानगरपालिकेच्या आपत्कालीन व्यवस्थापन विभागातर्फे टप्पेनिहाय प्रशिक्षण देण्यात येत आहे. दुर्घटना घडल्यास काय करावे, काय करू नये याबाबत रहिवाशांना प्रशिक्षण देण्यात येत आहे.
पावसाळा सुरू झाल्यानंतर मुंबईतील काही ठिकाणी दरड कोसळण्याचा धोका असतो. दरड कोसळल्यास काय करावे, काय करू नये याबाबत संबंधित परिसरात वास्तव्यास असलेल्या रहिवाशांना आपत्ती व्यवस्थापन विभागाकडून प्रशिक्षण देण्यात येत आहे. राष्ट्रीय आपत्ती प्रतिसाद पथकाच्या मुंबईतील तुकड्यांचे प्रमुख उपसमादेशक सारंग कुर्वे यांनी प्रशिक्षणासाठी आवश्यक मनुष्यबळ उपलब्ध केले आहे.
याअंतर्गत आतापर्यंत २५० नागरिकांना प्रशिक्षण देण्यात आले असून प्रशिक्षणाची प्रक्रिया यापुढेही सुरू राहणार आहे, अशी माहिती आपत्ती व्यवस्थापन खात्यातील अधिकाऱ्यांनी दिली. तसेच आपतकालीन परिस्थिती उद््भवल्यास नागरिकांनी तात्काळ आपत्ती व्यवस्थापन विभागाशी संपर्क साधावा, असेही आवाहन या अधिकाऱ्यांनी केले.
मुंबई महानगरातील पश्चिम उपनगरातील बांदिवली टेकडी, यादव नगर, जोगेश्वरी (पश्चिम), पूर्व उपनगरातील कुर्ला कसाईवाडा, वाशी नाका चेंबूर येथील भारत नगर, घाटकोपर येथील वर्षानगर आदी परिसरातील रहिवाशांना या कार्यशाळांद्वारे प्रशिक्षण देण्यात येत आहे. महानगरपालिकेने या परिसरातील रहिवाशांसाठी सुट्टीच्या दिवशी दोन दिवसीय प्रशिक्षण कार्यशाळेचे आयोजन केले. भविष्यातही अशा प्रशिक्षण कार्यशाळांचे आयोजन करण्यात येणार आहे. विभागस्तरीय सहायक आयुक्तांच्या मार्गदर्शनाखाली हे प्रशिक्षण देण्यात येत आहे.
हेही वाचा >>>‘मातोश्री’वरील सुरक्षेत कपात; शिवसेना नेत्यांचा दावा, पोलिसांकडून इन्कार
यावेळी उपस्थितांकडून काही महत्त्वाची प्रात्यक्षिकेही करून घेण्यात आली. या प्रशिक्षण कार्यक्रमामध्ये आपत्कालीन व्यवस्थापनाची आवश्यकता, आपत्ती म्हणजे काय, धोक्यांची ओळख, धोके म्हणजे काय, जोखिम कशी ओळखावी, जोखिम म्हणजे काय, आपत्तीचे प्रकार, विविध प्रकारच्या आपत्तीमध्ये अगोदर, नंतर काय करावे व काय करू नये, आपत्कालीन व्यवस्थापन चक्र (सज्जता, उपशमन, प्रतिरोध तसेच प्रतिसाद) मुंबई महानगरपालिकेतील आपत्कालीन व्यवस्थापन विभागाचे कार्य, याबबत चर्चा करून सज्जता, उपशमन, प्रतिबंध कसे करावे व घटना घडलीच तर प्रतिसाद कसा द्यावा ? प्रथमोपचार म्हणजे काय, प्रथमोपचाराची मार्गदर्शक तत्वे, जखमांचे प्रकार, लक्षणे आणि उपचार, ट्रॉमा व्यवस्थापन तसेच सी.पी.आर. म्हणजे काय? तो कधी व केव्हा द्यावा आदींबाबत शास्त्रशुद्ध प्रशिक्षण देण्यात येत आहे.
