दोन अल्पवयीन मुलींचा विनयभंग करणाऱ्या ६५ वर्षीय व्यक्तीला अटक

पीडित मुली १६ व १७ वर्षे वयोगटातील आहेत. त्या सोमवारी खासगी शिकवणी बाहेर उभ्या होत्या. आरोपी तेथे आला व त्याने पीडित मुलींचा विनयभंग केला. त्यामुळे मुली घाबरल्या. मुलींनी आरडाओरडा केल्यामुळे जमावाने सदर व्यक्तीला पकडले. त्यापैकी एका पीडित मुलीने घडलेला प्रकार कुटुंबियांच्या कानावर घातला. त्यानुसार मुलीचे वडील घटनास्थळी दाखल झाले. त्यांनी पोलिसांना दूरध्वनी केला. त्यानंतर पोलीस पथक घटनास्थळी आले व त्यांनी आरोपी ताब्यात घेतले. याप्रकरणी पीडित मुलीच्या वडिलांच्या तक्रारीवरून पोलिसांनी भारतीय न्याय संहिता कलम ७४ अंतर्गत विनयभंग व पोक्सो कायदा कलम ८ अंतर्गत गुन्हा दाखल केला. त्यानंतर ६५ वर्षीय आरोपीला अटक करण्यात आली. आरोपी व तक्रारदार मुली एकमेकांना ओळखत नाही, अशी माहिती पोलिसांनी दिली.