मुंबई: घराबाहेर खेळत असताना मुलुंड येथे एका सहा वर्षांच्या मुलाला उघड्या विद्युत वाहिनीचा धक्का लागून त्याचा मृत्यू झाला होता. तपासानंतर याप्रकरणी मुलुंड पोलिसांनी नऊ महिन्यानंतर महावितरणच्या दोन अधिकाऱ्यांसह एकूण सहा जणांवर गुन्हा दाखल केला आहे.
अर्णव भंडारे असे यातील मयत मुलाचे नाव असून तो मुलुंड कॉलनी येथे राहत होता. त्याच्या घराजवळून महावितरण कंपनीची वीज वाहिनी गेली होती. ती उघडी होती. घराबाहेर खेळत असताना अर्णवचा स्पर्श वीज वाहिनीला झाला आणि त्याला विजेचा जोरदार झटका लागला. त्यात तो गंभीर जखमी झाला होता. त्याच्या कुटुंबीयांनी तत्काळ त्याला एका खासगी रुग्णालयात दाखल केले. मात्र त्याची प्रकृती गंभीर असल्याने त्याला पालिकेच्या अगरवाल रुग्णालयात दाखल करण्यात आले होते. तेथे त्याचा उपचारादरम्यान मृत्यू झाला.
हेही वाचा – बेस्ट वाचवण्यासाठी गणेशोत्सव मंडळांना साद
मुलुंड पोलिसांना घटनेची माहिती मिळताच त्यांनी यात अपमृत्यूची नोंद केली होती. मात्र महावितरणच्या निष्काळजीपणामुळे ही घटना घडल्याचा आरोप करून अर्णवच्या कुटुंबीयांनी चौकशीची मागणी केली होती. त्यानुसार मुलुंड पोलिसांनी तपास केला असता महावितरण अधिकारी आणि स्थानिक रहिवाशांच्या निष्काळजीपणामुळेच ही घटना घडल्याचे तपासात समोर आले आहे. त्यानुसार पोलिसांनी दोन अधिकारी आणि चार स्थानिक रहिवासी असे एकूण सहा जणांवर मंगळवारी गुन्हा दाखल केला आहे.
