दुरावस्थेत असलेले आरे रुग्णालय अखेर सुरू होणार; वैद्यकीय संस्थेची निवड; प्रस्ताव दुग्धविकास विभागाला सादर

रुग्णालय चालविण्यासाठी आवश्यक त्या प्रक्रियेअंती एकूण आठ संस्थाची निवड करण्यात आली. निवडलेल्या संंस्थांनी आवश्यक त्या बाबींची पूर्तता केली असून त्यांना वैद्यकीय क्षेत्रातील १७ वर्षांचा अनुभव आहे, असे आरे दूध वसाहतीचे मुख्य कार्यकारी अधिकारी बाळासाहेब वाकचौरे यांनी सांगितले. संस्थेचे दर आणि निकषांबाबतही निर्णय घेण्यात आला असून यासंदर्भात योग्य त्या प्रक्रियेचे पालन करण्यात आले आहे. यापुढील निर्णय राज्य सरकार घेणार असल्याचे वाकचौरे यांनी स्पष्ट केले.

हेही वाचा… १७ पोलीस वसाहतींचा पुनर्विकास म्हाडा करणार!

दरम्यान, पूर्वीच्या अहवालांनुसार रहिवाशांकडून रुग्णालयाच्या खाजगीकरणाला विरोध करण्यात येत होता. त्यानंतर सर्वानुमते रुग्णालय सार्वजनिक प्राधिकरणांतर्फे पूर्णपणे चालविण्याऐवजी धर्मादाय संस्थेच्या माध्यमातून चालविण्याचा निर्णय घेण्यात आला होता.

आरे येथील रुग्णालय चालविण्यासाठी कोलकाता येथील आत्माराम गीतादेवी केजरीवाल ट्रस्ट, आर्यन मेडिकल ॲण्ड एज्युकेशन संस्थे, अग्रवाल जनसेवा चॅरिटेबल ट्रस्ट, महात्मा फुले चॅरिटेबल ट्रस्ट, साई लीला फाउंडेशन ट्रस्ट, सपना सुबोध सावजी चॅरिटेबल ट्रस्ट, एसएल चॅरिटेबल ट्रस्ट आणि रोशन लाईफ फाउंडेशन या आठ संस्थांनीही स्वारस्य दाखविले होते. अखेर सर्व निकषांची पडताळणी करून आर्यन मेडिकल ॲण्ड एज्युकेशन संस्थेची निवड करण्यात आली. आरेतील १ एकर जागेवर हे रुग्णालय आहे. आरे वसाहतीमध्ये सुमारे २७ आदिवासी पाडे आहेत. तसेच कर्मचारी वसाहतींमध्ये हे केंद्र महत्त्वाचे आहे. या परिसरात या रुग्णालयाखेरीज आरोग्यसेवा नाही.