मुंबई – घरात भावंडांशी खेळत असताना दोरीचा फास लागल्याने एका सात वर्षाच्या मुलीचा मृत्यू झाल्याची घटना रविवारी गोवंडीच्या शिवाजी नगर परिसरात घडली. याबाबत शिवाजी नगर पोलिसांनी घटनेची नोंद करत तपास सुरू केला आहे.
बैंगवाडी येथे रविवारी दुपारी बाराच्या सुमारास आकृती सिंह ही तिची भावंडे आणि शेजारील एका मुलीबरोबर लपाछपी खेळत होती. त्यावेळी घरातील इतर सदस्य बाहेर गेले होते. त्यामुळे घरात ही चार मुले होती. त्याचवेळी पोटमाळ्यावरून खाली उतरण्यासाठी लावण्यात आलेल्या शिडीच्या दोरीचा फास मुलीच्या गळ्यात अडकला. तिच्या मोठ्या बहिणीने तत्काळ घराबाहेर धाव घेत शेजाऱ्यांना घटना सांगितली. शेजाऱ्यांनी तिला खाली काढून परिसरातील एका खासगी रुग्णालयात दाखल केले. मात्र उपचारापूर्वीच तिचा मृत्यू झाला होता.
हेही वाचा – Worli accident : वरळीत अपघातात निष्काळजीपणामुळे मृत्यूचे कलम वाढवले
शिवाजीनगर पोलिसांना घटनेची माहिती मिळताच त्यांनी मुलीच्या घरी धाव घेत तपास सुरू केला. मुलीचा मृत्यू फास लागल्याने झाला असल्याचे समोर आले आहे. त्यानुसार पोलिसांनी अपमृत्यूची नोंद करत तपास सुरू केला आहे.
