मुंबई सुशोभीकरण प्रकल्पाअंतर्गत करण्यात येणाऱ्या विविध कामांवर देखरेख ठेवण्यासाठी दक्षता समिती स्थापन करण्यात येणार आहे. ही कामे ठरलेल्या मुदतीत पूर्ण होत आहेत की नाहीत, तसेच कामांच्या गुणवत्तेवर लक्ष ठेवण्याची जबाबदारी या समितीवर सोपविण्यात येणार आहे.मुख्यमंत्री एकनाथ शिंदे यांच्या आदेशानुसार मुंबई सुंदर आणि अधिक आकर्षक बनविण्यासाठी महानगरपालिकेने ‘मुंबई सुशोभिकरण प्रकल्प’ हाती घेतला आहे. या प्रकल्पातील विविध कामे तत्काळ सुरू व्हावी आणि एकूण निश्चित कामांपैकी किमान ५० टक्के कामे डिसेंबर २०२२ अखेरपर्यंत, तर उर्वरित कामे मार्च २०२३ अखेरपर्यंत पूर्ण करण्याचे निर्देश मुंबई महानगरपालिका आयुक्त इक्बाल सिंह चहल यांनी दिले होते. मात्र प्रत्यक्षात हा प्रकल्प निविदा प्रक्रियेच्या स्तरावरच रखडला होता. डिसेंबरच्या दुसऱ्या आठवड्यात या प्रकल्पातील ५०० कामांचे भूमिपूजन करण्यात आले. या कामांचा आढावा घेण्यासाठी व कामे वेळेत पूर्ण करण्यासाठी दक्षता समिती नेमण्यात येणार आहे. तसे आदेश इकबाल सिंह चहल यांनी नुकतेच दिले आहेत.
हेही वाचा >>>“मोदी नव्या भारताचे राष्ट्रपिता”, अमृता फडणवीसांच्या विधानावर संजय राऊतांचं सूचक विधान; म्हणाले, “मी यावर…!”
या प्रकल्पाच्या अंमलबजावणीचा विभाग कार्यालय स्तरावर दर आठवड्याला, तर परिमंडळ स्तरावर दर पंधरवड्याला आढावा घ्यावा, असे निर्देश देण्यात आले आहेत. तसेच सर्व २४ विभाग कार्यालये आणि संबंधित खात्यांच्या स्तरावरही दक्षता समिती नेमावी. या समित्यांनी प्रामुख्याने सुशोभिकरण प्रकल्पांतर्गत होणाऱ्या कामांची प्रगती व गुणवत्तेवर लक्ष ठेवावे. तसेच कोणत्याही स्वरूपाच्या तक्रारी प्राप्त झाल्यास तातडीने त्याचे निराकरण करावे, ही कामे दक्षता समितीला करावी लागणार आहेत.
हेही वाचा >>>“बोम्मई रोज कानफडात मारतायत आणि मुख्यमंत्री गाल चोळत…”, संजय राऊतांचं टीकास्र; शिंदे-फडणवीसांना केलं लक्ष्य!
या प्रकल्पांतर्गत १६ प्रकारची कामे करण्यात येणार आहेत. रस्त्यांचे पुनःपृष्टीकरण, रस्ते, पूल, पदपथ, वाहतूक बेट, समुद्रकिनारे, उद्याने इत्यादी सार्वजनिक ठिकाणी स्वच्छता, सुधारणा, सुशोभित हरितीकरण, आकर्षक प्रकाशयोजना, पदपथांवर आसन व्यवस्था, रोषणाई, पूलाखालील जागेची रंगरंगोटी, आकाश मार्गिकांचे (स्काय वॉक) सुशोभिकरण, समुद्र किनाऱ्यांवर रोषणाई, डिजिटल जाहिरात फलक, किल्ल्यावर रोषणाई, सुविधा केंद्र उभारणे, वृक्ष लागवड आदी कामे करण्यात येणार आहेत.