निविदा न मागविता खरेदी केल्याच्या घोटाळ्याप्रकरणी राज्याच्या लाचलुचपत प्रतिबंधक विभागाने महिला व बालकल्याण विभागाकडून माहिती मागविली आहे. ही माहिती आल्यानंतरच पुढील चौकशी केली जाणार असल्याचे एसीबीतील सूत्रांनी सांगितले. या संदर्भात महिला व बालकल्याण विभागाच्या प्रधान सचिवांना बुधवारी सायंकाळी पत्र पाठविण्यात आले आहे.
चिक्की तसेच इतर साहित्यापोटी २०६ कोटींची खरेदी निविदा न मागविता करताना घोटाळा झाल्याचा आरोप महिला व बालकल्याणमंत्री पंकजा मुंडे यांच्यावर करण्यात आला होता. या प्रकरणी महाराष्ट्र काँग्रेसच्या वतीने एसीबीकडे रीतसर तक्रार दाखल करण्यात आली होती. या तक्रारीनंतर एसीबीने महिला व बालकल्याण विभागाला पत्र पाठवून माहिती मागविली आहे.
या कथित खरेदीप्रकरणी माहिती मागविणारे एसीबीचे पत्र आम्हाला मिळाले आहे. या पत्रात मागितलेल्या माहितीनुसार सविस्तर अहवाल तयार केला जाणार आहे. हा अहवाल मुख्यमंत्री व मुख्य सचिवांना उद्यापर्यंत सादर केला जाईल आणि त्यानंतर तो तो एसीबीपर्यंत पाठविला जाईल, असे या विभागाचे प्रधान सचिव संजय कुमार यांनी वृत्तसंस्थेशी बोलताना स्पष्ट केले.