कारागृहात गळफास लावून आरोपीची आत्महत्या

मुंबई : बोरिवली येथील कारागृहामधील (जनरल लॉकअप) आरोपी दीपक जाधव याने गळफास लावून आत्महत्या केल्याची घटना शुक्रवारी सकाळी घडली. कर्तव्यावरील पोलिसांनी तात्काळ दीपकला शताब्दी रुग्णालयात दाखल केले. रुग्णालयातील डाॅक्टरांनी तपासणी करून त्याला मृत घोषित केले. बोरिवली पश्चिम येथे राहणारा दीपक जाधव (२८) याला बुधवारी बोरिवली पोलिसांनी कलम ३०२ सह विविध कलमांद्वारे अटक केली होती. त्यानंतर २८ जुलैपर्यंत त्याला पोलीस कोठडीत ठेवण्याचे आदेश देण्यात आले होते. त्याला २७ जुलै रोजी बोरिवली कारागृहात ठेवण्यात आले. मात्र शुक्रवारी सकाळी ८.१० च्या सुमारास दीपक याने गळफास घेतला. दरवाज्याच्या खिळ्याला धाग्याने गळफास घेतल्याने तो बेशुध्द पडला. त्याला तात्काळ शताब्दी रुग्णालयात दाखल करण्यात आले. मात्र तपासणी करून डाॅक्टरांनी त्याला मृत घोषित केले.