मुंबई : मुंबईत बनावट नकाशांआधारे परवानग्या मिळवून करण्यात आलेली ४५७ बांधकामांवर कारवाई केली जाणार आहे. या बांधकामांबाबत विशेष तपास पथकाद्वारे चौकशी करून गुन्हे दाखल करण्यात यावेत. ही बांधकामे पाडण्यात यावीत, असे आदेश महसूलमंत्री चंद्रशेखर बावनकुळे यांनी दिले आहेत.
बनावट नकाशांआधारे उभ्या राहिलेल्या बांधकामांबाबत विधिमंडळाच्या सभागृहात उपस्थित झालेल्या मुद्द्यांबाबत महसूलमंत्री चंद्रशेखर बावनकुळे यांच्या अध्यक्षतेखाली मंत्रालयात बैठक घेण्यात आली. या वेळी महापालिका आयुक्त भूषण गगराणी यांनी माहिती देताना बांधकाम परवानगी ऑनलाइन दिली जात असल्याची माहिती दिली. ते म्हणाले की, बनावट कागदपत्रांच्या आधारे मिळविलेल्या परवानगीच्या आधारे केलेली बांधकामे ही अनधिकृत ठरतात, अशी ४५७ बांधकामे असून त्यापैकी ६६ प्रकरणी कारवाई करण्यात आली असून इतरांना नोटीस देण्यात येईल. त्याचप्रमाणे विशेष तपास पथकाकडेदेखील तक्रार दाखल करण्यात येईल. आतापर्यंत झालेल्या चौकशीनुसार २० जणांवर गुन्हे दाखल करण्यात आल्याची माहिती एसआयटीमार्फत देण्यात आली. या वेळी आमदार योगेश सागर, सुनील शिंदे बैठकीस प्रत्यक्ष तर अॅड. अनिल परब, सचिन अहिर ऑनलाइन उपस्थित होते.