मुंबई : गणेशोत्सव सुरू झाला असून मुंबईमध्ये गणेश दर्शनासाठी मोठ्या संख्येने भाविक येत असतात. तसेच देश-विदेशातील अनेक पर्यटक खास गणेशोत्सवात मुंबईला भेट देतात. गणेशोत्सवानिमित्त मुंबईत होणारी गर्दी लक्षात घेऊन बेस्ट उपक्रमाने नागरिकांसाठी अतिरिक्त बसगाड्या सोडण्याचा निर्णय घेतला आहे. भाविक आणि पर्यटकांसाठी १९ ते २७ सप्टेंबर या काळात रात्रीच्या वेळी अतिरिक्त बसगाड्या सोडण्यात येणार आहेत. रात्री कुलाबा परिसरातून उत्तर-पश्चिम मुंबईकडे गिरगाव, लालबाग, परळ, चेंबूरमार्गे बस चालविण्यात येणार आहेत. बसमार्ग क्रमांक ४ मर्या., ७ मर्या., ८ मर्या., ए – २१, ए – ४२, ४४, ६६, ६९ व सी -४० या बसमार्गावर रात्रीच्या अतिरिक्त बस फेऱ्या होतील, अशी माहिती बेस्ट उपक्रमाकडून देण्यात आली.
गणेशोत्सवाच्या पहिल्या दिवशीच गणरायाचे दर्शन घेण्यासाठी लालबाग परिसरात भाविकांनी गर्दी केली होती. त्यामुळे या मार्गावरील अनेक रस्त्यावर वाहतूक कोंडी झाली होती. लालबाग येथे मंगळवारी सकाळी भाविकांची प्रचंड गर्दी झाल्याने बेस्ट बस क्रमांक ६६ भारतमाता सिग्नलवरून चिंचपोकळी पुलाऐवजी करी रोड पुलामार्गे वळवण्यात आली. तसेच बसमार्ग ४४, ५० च्या मार्गातही बदल करण्यात आला. लालबाग येथील डॉ. बाबासाहेब आंबेडकर मार्गावर दुपारी मोठ्या प्रमाणात वाहतूक कोंडी झाल्याने डाऊन दिशेकडील बसमार्ग क्रमांक १, ४, ५, ६, ७, ८, ११, १५, १९, २१, २२, २५, ५१ लालबाग पुलावरून रवाना करण्यात आल्या. त्यानंतर रात्री हे सर्व मार्ग पूर्ववत करण्यात आले, अशी माहिती बेस्ट उपक्रमाकडून देण्यात आली.
