मुंबई : मुंबई विद्यापीठातर्फे पीएच.डी. प्रवेशपूर्व परीक्षा (पेट) आणि पदव्युत्तर विधि अभ्यासक्रमाच्या (एलएलएम) प्रवेशपूर्व परीक्षेसाठी विद्यार्थ्यांना त्यांच्या लॉगिनमध्ये आणि ई-मेल आयडीवर प्रवेशपत्र (हॉल तिकीट) उपलब्ध करण्यात आले आहे. या दोन्ही परीक्षा मुंबई विद्यापीठातर्फे ऑनलाइन सेंटर बेस्ड टेस्ट ( सीबीटी) पद्धतीने रविवार, १७ नोव्हेंबर रोजी विविध केंद्रांवर घेतल्या जाणार आहेत.
‘पेट’साठी एकूण ४ हजार ९६० विद्यार्थ्यांनी ऑनलाईन अर्ज सादर केले आहेत. तर ‘एलएलएम’ प्रवेशपूर्व परीक्षेसाठी एकूण ४ हजार ४९६ विद्यार्थ्यांनी अर्ज केले आहेत. ‘पेट’ सकाळच्या सत्रात १०.३० ते दुपारी १२.३० या दोन तासांच्या कालावधीत होईल, तर ‘एलएलएम’ प्रवेशपूर्व परीक्षा दुपारी ३ ते ४ या एक तासाच्या कालावधीत घेतली जाणार आहे. परीक्षार्थींनी परीक्षेच्या १ तास आधी संबधित परीक्षा केंद्रांवर उपस्थित राहावे, असे आवाहन परीक्षा व मूल्यमापन मंडळाच्या संचालक डॉ. पूजा रौंदळे यांनी केले आहे.
हेही वाचा – पानसरे हत्या प्रकरणाचा सर्व पैलूंनी तपास, एटीएसचा उच्च न्यायालयात दावा
‘पेट २०२४‘साठी सर्वाधिक विज्ञान व तंत्रज्ञान विद्याशाखेसाठी अर्ज
‘पेट‘साठी प्राप्त झालेल्या एकूण ४ हजार ९६० अर्जांपैकी सर्वाधिक विज्ञान व तंत्रज्ञान विद्याशाखेसाठी २ हजार २८५ अर्ज प्राप्त झाले आहेत. त्यापाठोपाठ मानव्य विद्याशाखेसाठी १ हजार ९९, वाणिज्य व व्यवस्थापन विद्याशाखेसाठी ८१३ आणि आंतरविद्याशाखेसाठी ७६३ एवढे अर्ज प्राप्त झाले आहेत. तसेच या एकूण अर्जांमध्ये २ हजार ८०४ विद्यार्थिनींचा, तर २ हजार १५५ विद्यार्थ्यांचा समावेश आहे. तसेच एका तृतीयपंथी विद्यार्थ्यानेही अर्ज केला आहे.
© The Indian Express (P) Ltd