मुंबई : म्हाडाच्या छ. संभाजीनगर मंडळाकडून नव्या वर्षात छ. संभाजी नगरमधील ११५० घरांसाठी सोडत काढण्याचा निर्णय घेतला आहे. या सोडतीसाठी जानेवारीत जाहिरात प्रसिद्ध केली जाणार आहे. तर नागपूरमधील अंदाजे ४५० घरांसाठीही जानेवारीत सोडतीची जाहिरात प्रसिद्ध करण्यात येणार आहे.
मुंबई आणि पुण्यातील घरांसाठी नुकतीच सोडत पार पडली असून या सोडतीतील घरांची ताबा प्रक्रिया सध्या सुरु आहे. तर कोकण मंडळातील ५३११ घरांपैकी २९७० घरांसाठीची सोडतपूर्व प्रक्रिया पूर्ण झाली असून लवकरच सोडतीची नवीन तारीख जाहीर होणार आहे. तेव्हा आता उर्वरित नागपूर, अमरावती, नाशिक, छ. संभाजी नगर आदी मंडळातील उपलब्ध घरांसाठी लवकरात लवकर, जानेवारीत जाहिरात प्रसिद्ध करण्याचे आदेश म्हाडा उपाध्यक्ष संजीव जयस्वाल यांनी नुकतेच संबंधित मंडळांना दिले आहेत. त्यानुसार आता लवकरच उपलब्ध घरांचा शोध घेत जानेवारीत सोडतीसाठीची जाहिरात प्रसिद्ध करण्याचा संबंधित विभागीय मंडळाच्या मुख्य अधिकाऱ्यांचा प्रयत्न असणार आहे.
हेही वाचा – बनावट प्रमाणपत्र सादर करणाऱ्या आणखी एकाविरोधात म्हाडाकडून गुन्हा दाखल
हेही वाचा – मुंबई : ग्रँटरोडमध्ये रस्त्यावर झाड पडले, बस मार्ग वळवावे लागले
त्यानुसार नागपूरमध्ये अल्प, अत्यल्प, मध्यम आणि उच्च गटातील अंदाजे ४५० घरे सोडतीसाठी उपलब्ध आहेत. तेव्हा या घरांसाठी नवीन वर्षात सोडत काढण्यात येणार असून यासाठी जानेवारीत जाहिरात प्रसिद्ध केली जाईल, अशी माहिती नागपूर मंडळाचे मुख्य अधिकारी महेश मेघमाळे यांनी दिली. तर छ. संभाजी नगर मंडळाकडे ११५० घरांसह भूखंड उपलब्ध असून या घरांसाठीही जानेवारीत जाहिरात प्रसिद्ध केली जाणार असल्याची माहिती मंडळाचे मुख्य अधिकारी मंदार वैद्य यांनी दिली.
