खासदार नवनीत राणा आणि आमदार रवी राणा यांना आज(शनिवार) खार पोलिसांनी अटक केली आहे. या दामप्त्याची आजची रात्र पोलीस ठाण्यातच जाणार आहे. त्यांच्यावर पोलिसांनी कलम १५३ (अ) अंतर्गत कारवाई करत, गुन्हा दाखल केला आहे. याशिवाय आणखी काही कलमं देखील लावण्यात आलेले आहेत. उद्या त्यांना न्यायालयात हजर केले जाणार आहे. या अटकेच्या कारवाईनंतर आता भाजपा नेत्यांकडून ठाकरे सरकावर टीका सुरू झाली आहे. विरोधी पक्षनेते देवेंद्र फडणवीस यांनी ठाकरे सरकारवर निशाणा साधल्यानंतर, आता भाजपा नेते किरीट सोमय्या यांनी ठाकरे सरकारवर टीका केली आहे. तसेच, सोमय्या आजच खार पोलीस स्टेशनला देखील जाणार आहेत.
“खासदार आणि आमदार मुख्यमंत्र्याच्या निवास्थानासमोर हनुमान चालीसा वाचणार म्हणून संपूर्ण महाराष्ट्रात अशांतता निर्माण होणार, असं फक्त रावण सरकारच सांगू शकतं. ठाकरेंना भीती नवनीत राणा आणि रवी राणा यांची आहे, की हनुमान चालीसामुळे त्यांच्या घोटाळेबाज सरकारला आग लागणार याची भीती आहे. या माफिया सरकारचं पतन हे निश्चित आहे.” अशा शब्दांमध्ये किरीट सोमय्या यांनी ठाकरे सरकारवर निशाणा साधला आहे.
तसेच, “खासदार आणि आमदार राणा दांपत्याने करून दाखविले !!! हनुमान चालीसाचा विरोधात माफिया सेनेला रस्त्यावर यावे लागले. ठाकरे सरकारला भीती “हनुमान चालीसा”ची आहे का ठाकरे सरकारच्या घोटाळ्यांची लंका जळण्याची?” असं देखील किरीट सोमय्या यांनी ट्वीटद्वारे म्हटलेलं आहे.
तर, “महाराष्ट्रातील घटना व्यथित करणार्‍या आहेत. भाजपाच्या पोलखोल रथावर हल्ले : आरोपी अटकेत नाही, मोहित भारतीय यांच्यावर हल्ला : साधा गुन्हा दाखल नाही, महिला लोकप्रतिनिधीला २० फूट गाडण्याची भाषा : साधी दखल सुद्धा नाही, हनुमान चालीसा पठणाला राणा दाम्पत्य येतात तर : थेट अटक” असं फडणवीसांनी ट्वीटद्वारे ठाकरे सरकारवर निशाणा साधताना म्हटलं आहे.
