भारताच्या पहिल्या महिला पंतप्रधान इंदिरा गांधी यांची आज (१९ नोव्हेंबर) जयंती आहे. या निमित्ताने अनेक राजकीय नेते इंदिरा गांधींच्या कणखर नेतृत्वाचं कौतूक करत अभिवादन करत आहेत. उपमुख्यमंत्री आणि राष्ट्रवादी काँग्रेसचे बंडखोर नेते अजित पवार यांनीही इंदिरा गांधींना अभिवादन केलं. तसेच त्यांच्या झंझावाती राजकीय प्रवासावर भाष्य केलं. त्यांनी रविवारी (१९ नोव्हेंबर) एक्स या सोशल मीडिया प्लॅटफॉर्मवर पोस्ट केली आहे.
अजित पवार म्हणाले, “भारताच्या पहिल्या महिला पंतप्रधान आणि भारतरत्न इंदिरा गांधी यांना त्यांच्या जयंतीनिमित्त अभिवादन. त्यांचा झंझावाती राजकीय प्रवास तरुणांना प्रेरणा देतो, बळ देतो.”
प्रफुल पटेल यांनीही इंदिरा गांधींच्या जयंतीनिमित्ताने पोस्ट केली. ते म्हणाले, “भारताच्या माजी पंतप्रधान इंदिरा गांधी यांच्या जयंती निमित्त त्यांचं स्मरण करतो.”
राष्ट्रवादी काँग्रेसचे नेते नवाब मलिक यांनीही पोस्ट करत इंदिरा गांधींना अभिवादन केलं. ते म्हणाले, “मी माजी पंतप्रधान इंदिरा गांधींना त्यांच्या जयंतीनिमित्त विनम्र अभिवादन करतो. त्यांचं देशासाठी योगदान आणि बलिदान स्मरण करतो.”
