मुंबई : मुख्यमंत्री होण्यासाठी ४५ नाही, तर १४५ आमदार लागतात, अशी टीका करणारा संदेश भाजप नेते मोहित कंबोज-भारतीय यांनी उपमुख्यमंत्री अजित पवार यांना उद्देशून समाजमाध्यमांवर प्रसारित केल्याने वाद सुरु झाला. अजित पवार गटातील नेत्यांनी तीव्र नाराजी व्यक्त केल्यावर भाजपच्या वरिष्ठ नेत्यांनी कंभोज यांना तंबी दिली व त्यानंतर त्यांनी संदेश समाज माध्यमावरून हा संदेश काढून टाकला. गोपीचंद पडाळकर यांच्यापाठोपाठ कंबोज यांनी अजित पवारांच्या विरोधात टीकात्मक सूर लावल्याने भाजप नेत्यांनी अजितदादांना अद्यापही स्वीकारले नसल्याचेच स्पष्ट होते.
अजित पवार यांनी लालबागच्या राजाचे दर्शन घेतल्यावर एका कार्यकर्त्यांने ते मुख्यमंत्री व्हावेत, अशी गणरायाची प्रार्थना करणारा संदेश समाजमाध्यमांवरुन प्रसारित केला. त्यावर कंबोज यांनी ‘मुख्यमंत्री होण्यासाठी ४५ नाही, तर १४५ आमदार लागतात,’ असे प्रत्युत्तर दिले. त्यावरुन वाद सुरु झाला आणि पवार गटाने ही बाब उपमुख्यमंत्री देवेंद्र फडणवीस यांच्यासह वरिष्ठ भाजप नेत्यांच्या निदर्शनास आणली. वरिष्ठ नेत्यांनी कंबोज यांना तंबी देवून समाजमाध्यमांवरील संदेश मागे घ्यायला लावला. यासंदर्भात वारंवार संपर्क साधूनही कंबोज यांनी प्रतिसाद दिला नाही. मुख्यमंत्री एकनाथ शिंदे यांनी भाजपबरोबर सत्ता स्थापन केल्यानंतर गेल्या एक वर्षांहून अधिक काळात भाजप नेते व कार्यकर्त्यांनी काही प्रमाणात तरी त्यांना स्वीकारले आहे.
काही मतदारसंघात मतभेद असले, तरी शिवसेनेबरोबर गेली २५-३० वर्षे युतीत राहिल्याने ते भाजप नेत्यांना सवयीचे झाले आहेत. मात्र राष्ट्रवादी काँग्रेसविरोधात गेली १०-१५ वर्षे जोरदार प्रचार व विरोध केल्यानंतर सत्तेत सामील झालेल्या पवार यांना स्वीकारणे, भाजप नेते, पदाधिकारी व कार्यकर्त्यांना जड जात आहे. त्यामुळे काही ठिकाणी उघड, तर काही ठिकाणी छुप्या पध्दतीने भाजप व अजित पवार गटातील नेत्यांमध्ये संघर्ष किंवा कुरघोडय़ांचे राजकारण सुरु आहे. पवार यांची कार्यशैली आणि घेतलेले निर्णय अनेक भाजप नेत्यांना मान्य नसल्याने असे वादाचे प्रसंग निर्माण होत असल्याचे सूत्रांनी सांगितले.
