राज्याचे विरोधी पक्षनेते आणि राष्ट्रवादी काँग्रेसचे आमदार अजित पवारांनी राष्ट्रवादीचे अध्यक्ष शरद पवार यांच्यासमोरच मला विरोधी पक्षनेतेपदाच्या जबाबदारीतून मुक्त करा, असं वक्तव्य केलं. यानंतर राजकीय चर्चांना उधाण आलं आहे. खासदार सुप्रिया सुळेंना पक्षाचं कार्याध्यक्ष केल्यामुळे अजित पवार नाराज असल्याचीही चर्चा केली जाते. याबाबत राष्ट्रवादीचे खासदार अमोल कोल्हे यांना विचारलं असता त्यांनी त्यांची भूमिका स्पष्ट केली. ते मुंबईत पत्रकारांनी विचारलेल्या प्रश्नाला उत्तर देत होते.
अमोल कोल्हे म्हणाले, “हा फार मोठ्या स्तरावरचा प्रश्न माझ्या सारख्या सामान्य कार्यकर्त्याला विचारला आहे. अजित पवारांसारखा सक्षम नेता जेव्हा ही भूमिका मांडतो तेव्हा असं दिसतं की, संघटनेतील कामासाठी त्यांनी अशी इच्छा व्यक्त केली असावी. तसं असेल तर सर्व कार्यकर्त्यांना आनंदच आहे.”
“मी अजित पवारांच्या मागेच बसलो होतो”
“मी अजित पवारांच्या मागेच बसलो होतो. त्यांना असं म्हणायचं असेल की, ही जबाबदारी योग्य पद्धतीने पार पाडण्यासाठी त्यांना विरोधी पक्षनेतेपदाच्या जबाबदारीतून मुक्त करावं,” असं मत अमोल कोल्हेंनी व्यक्त केलं.
हेही वाचा : “…म्हणून मला विरोधी पक्षनेतेपदावरून मुक्त करा”, शरद पवारांसमोर अजित पवारांनी मांडली व्यथा; म्हणाले…
“कृपया काही वेगळे अर्थ लावू नका”
अजित पवार सुप्रिया सुळेंना कार्यध्यक्ष केल्यानंतर नाराज असल्याच्या चर्चा होतात. याबद्दल विचारलं असता अमोल कोल्हे म्हणाले, “आजच्या अजित पवारांच्या भाषणावेळी मी त्यांच्यामागेच बसलो होतो. त्यावरून मला तरी असं काही जाणवलं नाही. त्यामुळे कृपया काही वेगळे अर्थ लावू नका.”
