‘अपरिचित पुलं’ आज उलगडणार..

‘लोकसत्ता’तर्फे प्रकाशित करण्यात आलेल्या ‘अप्रकाशित पु. ल.’ या संग्राहय़ विशेषांकाच्या दुसऱ्या आवृत्तीच्या प्रकाशनानिमित्त त्याचे आयोजन करण्यात आले आहे.  ज्येष्ठ कलावंत चंद्रकांत काळे यांनी स्थापन केलेल्या ‘शब्दवेध’ या संस्थेमार्फत ‘अपरिचित पुलं’ हा कार्यक्रम सादर होणार असून, संस्थेच्या त्रिदशकपूर्तीच्या वर्षांत पुलंच्या जन्मशताब्दीनिमित्त हा अभिनव कार्यक्रम सादर करता येणे, हा एक सुंदर योग असल्याची भावना काळे यांनी व्यक्त केली आहे.

लेखक, नाटककार, चित्रपट पटकथाकार, दिग्दर्शक, अभिनेते, संगीतकार, कथाकथनकार आणि अनेक सामाजिक कार्याना कोणताही गाजावाजा न करता बळ देणारे सजग दाते अशी विविधांगी ओळख असलेल्या पु. ल. देशपांडे यांचे अष्टपैलुत्व त्यांच्या लेखनातूनही आढळून येते. विनोदी लेखनाबरोबरच त्यांनी चिंतनात्मक, गंभीर स्वरूपाचे, तरल काव्यात्मक लेखनही केल आहे. त्या अनुषंगाने चंद्रकांत काळे म्हणाले, की ‘अपरिचित पुलं’ या कार्यक्रमात विनोदाबरोबरच अशाच काही लेखनाचं दर्शन घडविण्याचा आमचा प्रयत्न आहे. तसेच पुलंच्या काही कविताही या वेळी गीत स्वरूपात गायल्या जाणार आहेत.

खोगीर भरती, अघळपघळ, हसवणूक, गाठोडं, उरलंसुरलं, मी एक शून्य यांसारख्या ललितसंग्रहातील लेखनावर आधारित हा कार्यक्रम आहे. अर्थातच पुलंचं जे साहित्य आधीच रंगमंचावरील सादरीकरणाद्वारे खूप लोकप्रिय झाले आहे ते या कार्यक्रमात टाळले आहे, असे काळे यांनी सांगितले.

‘शब्दवेध’ला यंदा ३० र्वष पूर्ण झाली आहेत. अमृतगाथा, प्रीतरंग, आख्यान तुकोबाराय, साजणवेळा, शेवंतीचं बन यांसारखे आठ कार्यक्रम या संस्थेने गेल्या तीन दशकांत सादर केले. संस्थेची त्रिदशकपूर्ती आणि पुलंची जन्मशताब्दी हा एक छान योग असून, या नवव्या कार्यक्रमाच्या निमित्ताने पुलंना केलेली ही मानवंदनाच आहे, असेही ते म्हणाले. या कार्यक्रमात चंद्रकांत काळे यांच्याबरोबर ज्येष्ठ अभिनेते गिरीश कुलकर्णी आणि सुनील अभ्यंकर हेही सहभागी होणार आहेत.

व्हीटीपी रिअ‍ॅलिटी आणि लोकमान्य मल्टिपर्पज को-ऑप. सोसायटी लि. आणि पीतांबरी हे या कार्यक्रमाचे सहप्रायोजक असून, पॉवर्ड बाय मँगो हॉलिडेज व पु. ना. गाडगीळ अ‍ॅन्ड सन्स आहे. या कार्यक्रमासाठी विनामूल्य प्रवेश असून प्रवेशिका तीस मिनिटे आधी कार्यक्रमस्थळी मिळणार आहेत.

लोकसत्ताच्या ‘अपरिचित पु. ल.’ या विशेषांकाबद्दल प्रख्यात अभिनेते दिलीप प्रभावळकर म्हणाले की, ‘‘आमच्या पिढीतील माझ्यासारख्या अनेक व्यक्तींवर  पुलंचा प्रचंड  प्रभाव आहे. त्यांच्या साहित्य, संगीत, विनोदावर आमचा पिंड  पोसला आहे. पण या विशेषांकाने त्यांचे अप्रकाशित साहित्य वाचून थक्क झालो. आपल्या आयुष्याचा महत्त्वाचा भाग असलेल्या पुलंच्या अफाट कलागुणांना कितीही अनुभवा, पुलं दशांगुळे उरतात.. स्तिमित करतात!’’