मुंबईः पत्नीने घटस्फोट दिल्याच्या रागातून ४० वर्षीय व्यक्तीने पत्नी व १२ वर्षांच्या मुलावर ॲसिड फेकल्याचा गंभीर प्रकार सोमवारी वांद्रे परिसरात घडला. या हल्ल्यात पत्नी व मुलगा दोघेही गंभीर भाजले असून त्यांना उपचारासाठी कस्तुरबा रुग्णालयात दाखल करण्यात आले आहे. दोघांचीही प्रकृती स्थीर असल्याची माहिती पोलिसांनी दिली. याप्रकरणी ४० वर्षीय आरोपी इशरत शेख याला निर्मल नगर पोलिसांनी अटक केली आहे. आरोपी इशरत शेख वांद्रे पूर्व येथील बेहराम पाडा परिसरात वास्तव्याला आहे. पत्नी अंजूम शेख (४०) हिने नुकताच त्याला मुस्लीम रितीरिवाजानुसार खुलानामा (घटस्फोट) दिला होता. त्यामुळे इशरत संतापला होता. याबाबत पोलिसांनी दिलेल्या माहितीनुसार, अंजुम सोमवारी नूरजहाँ गेट येथील घराच्या दरवाज्यात बसली होती. त्यावेळी इशरत तेथे आला व त्याने अंजूम व मुलगा रईस (१२) यांच्या अंगावर ॲसिड फेकले. ॲसिडमुळे भाजलेल्या दोघांनाही तात्काळ कस्तुरबा रुग्णालयात दाखल करण्यात आले. तेथे पोलिसांनी अंजुमला जबाब नोंदवला असता तिने घडलेल्या प्रकार सांगितला. या घटनेबाबत निर्मल नगर पोलिसांनी तात्काळ भारतीय न्याय संहिता कलम १२४(१) अंतर्गत ॲसिड हल्ला केल्याप्रकरणी इशरतविरोधात गुन्हा दाखल केला. याप्रकरणी इशरतला सोमवारी रात्री निर्मल नगर पोलिसांनी अटक केली.
