कवयित्री अनुराधा साळवेकर यांची एक गझलसदृश रचना आहे – ‘दीपदाने शांत होता पापणीचे काठ ओले। पैल गीताच्या सुरांना स्पर्शिण्याला शब्द आले॥’ या ओळी आठवाव्यात आणि आपल्या अनुभवानुसार, ‘शब्द आले’च्या ऐवजी ‘चित्र आले’ असा बदल करावा, असं काहीतरी सध्या ‘जहांगीर आर्ट गॅलरी’च्या सभागृह दालनात पाहायला मिळतं आहे. हे आहे तुका जाधव यांचं चित्रप्रदर्शन. तरुणपणापासूनच कविवृत्तीचे, काहीसे बेछूट अमूर्तचित्रकार अशी त्यांची ओळख, पण आता लौकिकार्थानं एसएनडीटीच्या दृश्यकला विभागातील ते निवृत्त प्राध्यापक आहेत. तरुणपणीच्या त्यांच्या ऊर्मी आजही कायम आहेत, हे त्यांच्या ताज्या चित्रप्रदर्शनातून समजतं. कॅनव्हासभर एखादा अनवट/ मिश्र छटांचा रंग आणि त्या ‘मुख्य’ रंगाला जणू विचलित करणारे, त्या रंगाचा एकसुरीपणा भिरकावून देण्यासाठी आपापले चढे सूर लावणारे आणखी अनेक रंग हे तुका जाधव यांच्या चित्रांचं साधारण रूप. ते आजही तसंच आहे. पण आता या चित्रांना स्पर्शाची नवी मिती लाभली आहे. स्पर्शानंच नेमका पोत, नेमका आकार जाणणं हे स्वत:च्या चित्रपद्धतीत नसलेलं तंत्र, दृष्टी हळूहळू अधू होत गेल्यामुळे तुका जाधव यांनी आत्मसात केलं. त्याचं फलित म्हणजे ही चित्रं. अनेकदा अधिक रंग घेऊन, तो हातानं इथून तिथे -किंवा एकाच जागी- फिरवून जाधव यांची चित्रं सिद्ध झाली आहेत. रंगवैविध्य आहेच. पण प्रदर्शनातल्या अखेरच्या भिंतीवर एक चित्र पूर्ण काळं आहे. त्या काळ्या चित्रात जणू खोबणीसारखा एक पिवळट आकार दिसतो. या खोबणीत पुन्हा दोन काळेच मोठे ठिपके. एक जाडसर – पुढे आलेला – डोळ्यांनी (आणि हातानंही) स्पर्श होऊ शकेल असा. दुसरा मात्र सपाट. निस्तेज. त्याआधीच्या भिंतींवरल्या एका हिरव्या चित्रात साळुंकीच्या डोळ्यासारखा एक आकार दिसतो; पण हा ‘केवलाकार’ आहे, त्याला मुद्दाम अर्थ देण्याचा अट्टहास करू नये, हेही लक्षात येतं. आणखी एका चित्रात ‘पंचशील’च्या ध्वजाप्रमाणे पाच रंग दिसतात. त्या रंगांचा खेळ-मेळ चित्राच्या मध्य भागात सुरू होतो. रंगलेपनाच्या ‘इम्पास्टो’ या तंत्रासारखा परिणाम साधणारं, पण प्रत्यक्षात तितकं हिशेबी नसलेलं काम अनेक ठिकाणी जाणवतं. हे रंगकार्य रंगाचं अस्तित्व मान्य करणारं आहेच, पण हे रंग इतरांसाठी आहेत. चित्र आहे ते स्पर्शातून अमूर्त आकाराकडे, आकारातून पुन्हा नेत्रस्पर्शाकडे येणारं. या प्रदर्शनाला ‘अनुत्तरंग’ असं नाव आहे.
गॅलऱ्यांचा फेरा : अमूर्तचित्राचा स्पर्श..
तरुणपणीच्या त्यांच्या ऊर्मी आजही कायम आहेत, हे त्यांच्या ताज्या चित्रप्रदर्शनातून समजतं.
या बातमीसह सर्व प्रीमियम कंटेंट वाचण्यासाठी साइन-इन करा
या बातमीसह सर्व प्रीमियम कंटेंट वाचण्यासाठी साइन-इन करा
Already have an account? Sign in
First published on: 12-01-2018 at 03:22 IST
Mumbai News (मुंबई न्यूज), Maharashtra News, Marathi News (मराठीतील बातम्या) वाचण्यासाठी डाउनलोड करा लोकसत्ताचं Marathi News App.
Web Title: Art exhibition in jehangir art gallery
