मुंबई : बीडीडी चाळ पुनर्विकास प्रकल्पाअंतर्गत ना. म. जोशी मार्ग चाळीतील १५४ पात्र पोलिसांना पुनर्वसन इमारतीतील हक्काच्या घराची हमी म्हाडाकडून देण्यात आली आहे. मंगळवारी म्हाडा भवनात या पोलिसांच्या घरांसाठी सोडत काढण्यात आली असून पुनर्विकासात नवीन इमारतींमधील त्यांची घरे निश्चित करण्यात आली आहेत.
बीडीडी पुनर्विकासाअंतर्गत पोलीस निवासस्थानांमध्ये राहणाऱ्या २२०० हून अधिक पात्र आजी-माजी पोलिसांना हक्काची घरे देण्याचा निर्णय राज्य सरकारने घेतला आहे. यासाठी १५ लाख रुपये अशी किंमत निश्चित करण्यात आली आहे. यासंबंधीचा शासन निर्णय जाहीर झाल्यानंतर म्हाडाच्या मुंबई मंडळाने पहिल्या टप्प्यातील पोलिसांची घरे रिकामी करून घेत इमारतींच्या पाडकामाला वेग देण्याचा निर्णय घेतला आहे. त्यानुसार ना. म. जोशी मार्ग येथील १५४ पात्र रहिवाशांना पुनर्वसन इमारतीतील घराची सोडतीद्वारे हमी देण्यात आली.
इमारत क्रमांक १, २, ५, १२ आणि १३ पोलीस विभागाच्या अखत्यारीत आहेत. या पाच इमारतींमध्ये एकूण १८२ निवासी गाळे/सदनिका आहेत. या निवासी गाळे/ सदनिकांमध्ये राहणाऱ्या १८२ पैकी १५४ पात्र गाळेधारकांची यादी पोलीस उपायुक्तांनी मुंबई मंडळाकडे दिली आहे. या यादीनुसार पात्र सदनिकाधारक पोलिसांसाठी घराची निश्चिती करण्यात आली. आता या पोलिसांशी करारनामा कण्यात येणार असून ते वास्तव्यास असलेल्या इमारती पाडून त्याजागी बांधकामाला सुरुवात करण्यात येणार आहे.
