भंडारा बलात्कार व हत्या प्रकरण : पोलीस निरीक्षक निलंबित

केंद्राने अहवाल मागविला
नवी दिल्ली : भंडारा बलात्कार व हत्या प्रकरणाची केंद्र सरकारने गंभीर दखल घेतली असून, केंद्रीय गृहमंत्रालयाने महाराष्ट्राच्या पोलीस महासंचालकांना भंडारा घटनेचा अहवाल पाठविण्यास सांगितले आहे.

राष्ट्रीय मानव हक्क आयोगाकडूनही दखल
राष्ट्रीय मानव हक्क आयोगानेही याप्रकरणी गुरुवारी महाराष्ट्र सरकारला नोटीस बजावली. याप्रकरणी चार आठवडय़ांत अहवाल द्या, असे आदेश आयोगाने राज्याच्या मुख्य सचिवांना दिले आहेत. ‘बळी गेलेल्या मुली अत्यंत गरीब घरातील असून त्यांच्या बेपत्ता होण्याची दखल पोलिसांनी सुरुवातीला घेतली नसल्याचे वृत्त प्रसारमाध्यमांनी दिले आहे. तसेच ग्रामस्थांच्या आंदोलनानंतर या मुलींच्या मृतदेहाचे पंचनामे करण्यात आले,’ असे आयोगाने निवेदनात म्हटले आहे.

पालकवर्ग दहशतीत
या घटनेमुळे भंडारा-गोंदिया जिल्ह्य़ातील पालकवर्ग प्रचंड दहशतीत आहे. विशेषत: शेतावर कामावर जाणाऱ्या पालकांना शाळेत गेलेल्या मुली घरी सुरक्षित येईपर्यंत घोर लागलेला असतो. घटनेच्या दिवशी मुलींनी एका दुकानातून चॉकलेट खरेदी केले. परंतु, त्या वेळी दोघीच होत्या. तिसरी मुलगी दुकानात आली नव्हती, अशीही माहिती मिळाली. या मुलींजवळ शंभरची नोट राहायची, असेही दुकानदाराने सांगितले. कुटुंबीयांवरच झालेले आरोप आणि अद्यापही हाती न लागलेले धागेदोरे यांनी पोलिसांवर प्रचंड दबाव आला असून एकूण २० पथके रात्रंदिवस आरोपींच्या माग काढण्यात व्यस्त आहेत. दहा पथकांना गुन्ह्य़ाचे वेगवेगळे पैलू तपासण्याच्या कामात जुंपण्यात आले आहे. त्यांनाही दिशा सापडलेली नाही.