मुंबईः ‘न्यू इंडिया को-ऑप. बँकेतील १२२ कोटी रुपयांच्या अपहाराप्रकरणी आर्थिक गुन्हे शाखेने पाच आरोपींच्या २१ मालमत्तांवर टाच आणण्याची परवानगी महादंडाधिकाऱ्यांकडे मागितली होती. महादंडाधिकाऱ्यांनी गुन्हे शाखेला परवानगी दिली असून त्यामुळे बँकेतील ठेवीदारांसाठी हा मोठा दिलासा मानला जात आहे.
या मालमत्ता सुमारे १६७ कोटी रुपयांच्या आहेत.आर्थिक गुन्हे शाखेने भारतीय नागरिक सुरक्षा संहिता कलम १०७ च्या तरतुदींनुसार न्यू इंडिया कोऑपरेटिव्ह बँक प्रकरणाच्या चौकशीदरम्यान गुन्ह्याच्या उत्पन्नातून मिळालेल्या मालमत्तांवर टाच आणण्यासाठी न्यायालयाकडे अर्ज दाखल केला होता. महादंडाधिकारी न्यायालयाने पोलिसांनाच्या युक्तिवादाचा विचार करून पाच आरोपींशी संबंधित २१ अचल मालमत्तांवर टाच आणण्यास परवानगी दिली. भारतीय नागरिक सुरक्षा संहिता कलम १०७ अंतर्गत टाच आणण्याचा मुंबईतील हा पहिलाच प्रकार आहे.
कोणकोणत्या मालमत्ता ?
न्यायालयाने २१ मालमत्तांवर टाच आणण्यासाठी परवानगी दिली आहेत. पाच आरोपींच्या मालकीच्या या मालमत्ता महाराष्ट्र, गुजरात आणि बिहारमध्ये आहेत. त्यात आरोपी हितेश मेहता व त्याचे कुटुंबीय यांच्या नावे सात सदनिका, एक दुकान व एक बंगला (एकूण किंमत १२ कोटी ) यांचा समवेश आहे. याशिवाय आरोपी अरुणाचलम याच्या नावे एक दुकान (किंमत दीड कोटी), आरोपी कपिल देडिया याच्या नावावरील ७५ लाखांची सदनिका, आरोपी जावेद आझम याच्या शोरूममधून जप्त केलेल्या ५५ लाखांच्या इलेक्ट्रॉनिक वस्तू, मधुबनी येथील दुकान (किंमत ५५ लाख), पटना येथील सदनिका (किंमत ५० लाख) अशा एकूण दीड कोटी रुपयांच्या मालमत्ता, तसेच बिहारमधील १० दुकानांसाठी दिलेले अडीच कोटी रुपये भाडे, याशिवाय आरोपी धर्मेश याचा सुमारे ४० हजार चौरस फूट क्षेत्रफळाचा झोपडपट्टी पुनर्विकास प्रकल्प (किंमत १५० कोटी) अशा सर्व मिळून १६७ कोटी ८५ लाख रुपयांच्या मालमत्तांचा समावेश आहे.
दोन आरोपी परदेशात
बँकेचे प्रभारी मुख्य कार्यकारी अधिकारी देवर्षी घोष यांच्या तक्रारीवरून दादर पोलिसांनी भारतीय न्याय संहिता कलम ३१६ (५), ६१ (२) अंतर्गत गुन्हा दाखल केला होता. त्यात १२२ कोटी रुपयांचा अपहार केल्याप्रकरणी बँकेचा महाव्यवस्थापक हितेश मेहता याला आर्थिक गुन्हे शाखेने अटक केली. मेहताकडून मिळालेल्या माहितीच्या आधारे बांधकाम व्यावसायिक धर्मेश पौन याला पोलिसांनी अटक केली. याशिवाय या प्रकरणात बँकेचा तत्कालीन सीईओ अभिमन्यू भोअन याला अटक करण्यात आली. याप्रकरणी चौथा आरोपी मनोहर अरूणाचलम, कपिल देढिया व उन्ननाथन अरूणाचलम यांना नुकतीच अटक करण्यात आली. याशिवाय याप्रकरणातील हिरेन भानू, गौरी भानू सध्या परदेशात असल्याची माहिती मिळाली आहे. त्यांच्याविरोधात पोलिसांनी लुकआऊट नोटीस काढली आहे.
