६८ टक्के मालमत्ता कर वसूल; नऊ महिन्यांत ५ हजार ८४७ कोटी मालमत्ता कर संकलन

हेही वाचा >>> डिजिटल कागदपत्रे गाह्य धरण्याबाबत वाहतूक पोलिसांना लेखी आदेश; डिजिटल कागदपत्रे दाखवल्यानंतरही दंडात्मक कारवाई

महानगरपालिका आयुक्त, प्रशासक भूषण गगराणी आणि अतिरिक्त महानगरपालिका आयुक्त अश्विनी जोशी यांच्या मार्गदर्शनाखाली आणि सहआयुक्त विश्वास शंकरवार यांच्या नेतृत्वाखाली करनिर्धारण आणि संकलन खाते कार्यरत आहे. महानगरपालिकेतर्फे कर संकलनाचे उद्दिष्ट्य साध्य करण्यासाठी विविध उपाययोजना हाती घेण्यात आल्या आहेत. मुंबईतील मालमत्ताधारकांना दिलेल्या मुदतीत कर भरणा करता यावा, यासाठी महानगरपालिकेच्या कर निर्धारण व संकलन विभागातर्फे वेळोवेळी व्यापक जनजागृती करण्यात येत आहे. मालमत्ताधारकांच्या सोयीसाठी शनिवारीही प्रशासकीय विभाग कार्यालय तसेच नागरी सुविधा केंद्र सुरू ठेवण्यात आली होती. दरम्यान, ३० डिसेंबर रोजी एका दिवसात तब्बल १७३ कोटी ५९ लाख रूपये, तर ३१ डिसेंबर रोजी २६० कोटी २८ लाख रूपये कर भरणा मालमत्ताधारकांनी केला. २०२३-२४ या आर्थिक वर्षासाठी मालमत्ता कर भरण्याची अंतिम मुदत २५ मे २०२४ पर्यंत वाढविण्यात आली होती. त्यामुळे मागील आर्थिक वर्षातील सुमारे १ हजार ६६० कोटी रुपये रक्कम यात समाविष्ट आहे. म्हणजेच २०२४-२५ या आर्थिक वर्षात ४ हजार १८७ कोटी १९ लाख रुपये कर संकलित झाला आहे.

हेही वाचा >>> तृतीय वर्ष ‘बी. कॉम.’ पाचव्या सत्र परीक्षेत ४१.७५ टक्के उत्तीर्ण; मुंबई विद्यापीठाकडून १८ दिवसांत निकाल जाहीर

१ एप्रिल २०२४ ते ३१ डिसेंबर २०२४ या कालावधीत शहर विभागातून एकूण १ हजार ७७४ कोटी ४३ लाख रुपये इतका मालमत्ता कर पालिकेच्या तिजोरीत जमा झाला. तसेच, पूर्व उपनगरातून १ हजार ९१ कोटी १० लाख रुपये आणि पश्चिम उपनगरातून २ हजार ९७९ कोटी ४५ लाख रुपयांचा मालमत्ता कर वसूल करण्यात पालिकेला यश आले. २०२४-२५ या आर्थिक वर्षाचा मालमत्ता कर भरण्यासाठी ३१ डिसेंबर २०२४ ही अंतिम मुदत देण्यात आली होती. कर भरणा करण्यासाठी महानगरपालिकेचे मुख्यालय, सर्व प्रशासकीय विभाग कार्यालयांमधील नागरी सुविधा केंद्रे रात्री उशिरापर्यंत सुरू होती. त्यामुळे ३० डिसेंबर रोजी सकाळी ८ पासून रात्री १० पर्यंत १७३ कोटी ५९ लाख रूपये आणि ३१ डिसेंबर रोजी सकाळी ८ पासून रात्री १२ पर्यंत २६० कोटी २८ लाख रुपये मालमत्ता कर नागरिकांनी भरला.