महापौरपदाचे उमेदवार महाडेश्वर यांच्यावर नियमबाह्यरित्या घर घेतल्याचा आरोप

साईप्रसाद हौसिंग सोसायटी ही महापालिकेतील कर्मचाऱ्यांसाठी आहे. येथे बाहेरील व्यक्तींना घर विकत घेता येत नाही. परंतु, महाडेश्वर यांनी हे घर विकत घेतल्याची तक्रार पवार यांनी महापालिका व न्यायालयात केली आहे. पालिकेने दखल न घेतल्याने आपण उच्च न्यायालयात गेल्याचे पवार यांनी एबीपी माझा या वृत्त वाहिनीशी बोलताना सांगितले. तसेच याच सोसायटीत माजी नगरसेविका पुजा महाडेश्वर यांच्याही नावाने एक फ्लॅट असल्याचा आरोप पवार यांनी केला. बाहेरच्या व्यक्तीने येथे घुसखोरी करून नियमबाह्यरित्या हे घर खरेदी केल्याचे त्यांनी म्हटले.
मात्र, महाडेश्वरांनी आपल्यावरील सर्व आरोप फेटाळले आहेत. एबीपी माझा या वृत्त वाहिनीशी बोलताना त्यांनी आपण राहत असलेले घर हे गजानन पंडित यांच्या नावाने असल्याचे त्यांनी सांगितले. पंडित हे सेवानिवृत्त असून त्यांच्या घरात आपण भाड्याने राहत असल्याचा खुलासा त्यांनी केला. या वादामुळे आता मुंबई पालिकेच्या राजकारणाला नवे वळण मिळण्याची शक्यता निर्माण झाली आहे.