“…तरच पुढील वर्षी निवडणुका होतील!” महापौर किशोरी पेडणेकरांनी दिले संकेत!

महापालिका निवडणुकांचं गणित बिघडलं!

२०२० आणि २०२१ या दोन्ही वर्षांना करोनामुळे निर्माण झालेल्या अभूतपूर्व परिस्थितीचा फटका बसला आहे. देशपातळीवर ४ राज्य आणि एक केंद्रशासित प्रदेशाच्या निवडणुका आणि महाराष्ट्रात स्थानिक स्वराज्य संस्थांच्या निवडणुका याच काळात पार पडल्या असल्या, तरी राज्यातल्या महानगर पालिका निवडणुकांना करोनाचा मोठा फटका बसला आहे. करोनाच्या पार्श्वभूमीवर २०२१ मध्ये नियोजित असलेल्या नवी मुंबई, वसई-विरार, कल्याण डोंबिवली यासारख्या महत्त्वाच्या महानगर पालिकांच्या निवडणुका पुढे ढकलण्यात आल्या आहेत. आता पुढील वर्षी २०२२मध्ये होऊ घातलेल्या ठाणे, पुणे, नाशिक, नागपूर आणि मुंबई या महत्त्वाच्या ५ महानगरपालिकांच्या निवडणुकांवर देखील करोनाचं सावट आहे.

काय म्हणाल्या महापौर?

मुंबईच्या महापौर किशोरी पेडणेकर यांनी मंगळवारी घेतलेल्या पत्रकार परिषदेमध्ये यासंदर्भात माहिती दिली आहे. “मुंबई महानगर पालिकेच्या निवडणुका पुढील वर्षी जानेवारी-फेब्रुवारीमध्ये होणार आहेत. पण करोनाची परिस्थिती नियंत्रणात असली, तरच या निवडणुका होऊ शकतील. जर ही परिस्थिती नियंत्रणात नसेल, तर निवडणुका पुढे ढकलल्या जातील”, असं किशोरी पेडणेकर यांनी सांगितलं आहे. दरम्यान, भाजपा आमदार आशिष शेलार यांनी “निवडणुका शक्य तेवढ्या पुढे ढकलण्याचा शिवसेनेचा प्रयत्न आहे”, अशी टीका केली आहे.

वाचा सविस्तर – मुंबईत पुन्हा कडक निर्बंध लागणार?

कधी संपणार पालिकेची मुदत?

मुंबई महानगर पालिकेचा कार्यकाळ पुढील वर्षी ७ मार्च २०२२ रोजी संपुष्टात येत आहे. त्यामुळे फेब्रुवारीमध्ये निवडणुका घेणं आवश्यक आहे. यासंदर्भात नुकतीच मुंबई महानगर पालिकेने निवडणुकांची पूर्वतयारी सुरू करण्याची परवानगी राज्य निवडणूक आयोगाकडे मागितली होती. तसे आदेश राज्य निवडणूक आयोगाकडून पालिकेला देण्यात आले आहेत. या तयारीमध्ये मतदान केंद्र, मुंबईतील प्रभागांची पुनर्रचना, आरक्षणाच्या आधारावर वॉर्डची रचना मतदार याद्या अद्ययावत करणे अशा कामांचा समावेश आहे.