मुंबई : मुंबई महानगरपालिकेने दरवर्षीप्रमाणे यंदाही उन्हाळ्याच्या सुटीत मुंबईकरांना पोहण्याचे प्रशिक्षण देण्याचा निर्णय घेतला असून यासाठी नव्याने सभासद नोंदणी सुरू करण्यात आली आहे. मुंबई महानगरपालिकेच्या दादर (प.) येथील महात्मा गांधी स्मारक ऑलिम्पिक जलतरण तलाव आणि चेंबूर (पू.) येथील जनरल अरुणकुमार वैद्य ऑलिम्पिक जलतरण तलावावर उन्हाळी सुट्टीदरम्यान २१ दिवसांचे प्रशिक्षण वर्ग सुरू करण्यात येणार आहेत. पहिला प्रशिक्षण वर्ग २ मे २०२५ पासून, तर दुसरा प्रशिक्षण २३ मे २०२५ पासून सुरू होणार आहे. प्रशिक्षणासाठी नाव नोंदणी ऑनलाईन पद्धतीने होणार आहे. त्यासाठीची लिंक सोमवार, २१ एप्रिल २०२५ सकाळी ११ वाजेपासून कार्यान्वित होणार आहे. तसेच इतर जलतरण तलावांवर मासिक, त्रैमासिक सभासदत्वाची सुविधा नव्याने उपलब्ध होणार आहे.

मुंबईकरांना जलतरणाची संधी उपलब्ध व्हावी यासाठी महानगरपालिका प्रशासनाने मुंबई ११ तरण तलाव उपलब्ध केले आहेत. मात्र, अनेकदा पोहण्याचे शास्त्रशुद्ध प्रशिक्षण न मिळाल्याने अनेक इच्छुक या क्रीडा प्रकारापासून लांब राहतात. पोहणे शिकण्याची इच्छा असणाऱ्या मुंबईकरांना मुंबई महानगरपालिकेने यंदा उन्हाळ्यात प्रशिक्षणाची संधी उपलब्ध करून देण्यात आली आहे.

महानगरपालिका आयुक्त आणि प्रशासक भूषण गगराणी आणि अतिरिक्त महानगरपालिका आयुक्त (पूर्व उपनगरे) डॉ. अमित सैनी यांच्या मार्गदर्शनानुसार आयोजित करण्यात येत असलेल्या या प्रशिक्षणासाठी नाव नोंदणी पूर्णपणे ऑनलाईन पद्धतीने करण्यात येणार आहे. त्यासाठीची लिंक सोमवार, २१ एप्रिल २०२५ पासून कार्यान्वित होणार असल्याची माहिती उप आयुक्त (उद्याने) अजित आंबी यांनी दिली.

हेही वाचा

नोंदणीसाठी येथे संपर्क साधावा

या दोन्ही जलतरण तलावात प्रशिक्षणासाठी माफक शुल्क आकारण्यात येणार आहे. पंधरा वर्षांपर्यंतची मुले, ६० वर्षांपुढील नागरिक, दिव्यांग व्यक्ती यांच्यासाठी २ हजार २१० रूपये, तर १६ ते ६० वयोगटातील नागरिकांसाठी ३ हजार ३१० रूपये शुल्क आकारण्यात येणार आहे. दादर आणि चेंबूर येथील दोन्ही जलतरण तलावांमध्ये दररोज दुपारी १२.३० ते १.३०, दुपारी २ ते ३.३० आणि दुपारी ३.३० ते ४.३० अशा तीन सत्रांमध्ये जलतरणाचे प्रशिक्षण देण्यात येणार आहे. दादर आणि चेंबूर वगळता इतर नऊ जलतरण तलावांमध्ये नागरिकांच्या सुविधेसाठी मासिक, त्रैमासिक सभादत्वाची सुविधा सुरू करण्यात येत आहे. त्याचीही नोंदणी २१ एप्रिल २०२५ पासून सुरू करण्यात येणार आहे. प्रशिक्षण आणि सभासदत्वाच्या नोंदणीसाठी https://swimmingpool.mcgm.gov.in/ या लिंकचा उपयोग करावा. सभासद नोंदणीच्या चौकशीसाठी टोल फ्रि क्रमांक १८००१२३३०६० वर संपर्क साधावा, असे आवाहन महानगरपालिका प्रशासनाकडून करण्यात आले आहे.

मासिक, त्रैमासिक सभादत्वाची सुविधा असलेल्या तलावांचा तपशील पुढीलप्रमाणे :-

कांदिवली (पश्चिम) येथील सरदार वल्लभभाई पटेल ऑलिम्पिक जलतरण तलाव

दहिसर (पश्चिम) येथील श्री भावदेवी कांदरवाडा जलतरण तलाव

दहिसर (पूर्व) येथील श्री मुरबाळीदेवी जलतरण तलाव

मालाड (पश्चिम) येथील मुंबई महानगरपालिका जलतरण तलाव

गिल्बनर्ट हिल, अंधेरी (पश्चिम) येथील मुंबई महानगरपालिका जलतरण तलाव

अंधेरी (पूर्व) येथील मुंबई महानगरपालिका जलतरण तलाव

वरळी येथील मुंबई महानगरपालिका जलतरण तलाव

विक्रोळी (पूर्व) येथील मुंबई महानगरपालिका जलतरण तलाव

वडाळा येथील मुंबई महानगरपालिका जलतरण तलाव