लोकसत्ता खास प्रतिनिधी
मुंबई : मुंबई विमानतळाच्या अधिकाऱ्यांना दूरध्वनी करून विमानतळाच्या टर्मिनल-१ वर बॉम्ब असल्याचे सांगून धमकी देणाऱ्या अज्ञात व्यक्तीविरुद्ध मुंबई पोलिसांनी शुक्रवारी गुन्हा दाखल केला. धमकीच्या दूरध्वनीनंतर सर्व संबंधित सुरक्षा यंत्रणा सतर्क झाल्या होत्या.
छत्रपती शिवाजी महाराज आंतरराष्ट्रीय विमानतळ टर्मिनल-१ वरील वरिष्ठ कार्यकारी अधिकारी गीतांजली नेरुरकर (३७) शुक्रवारी सकाळी कामावर उपस्थित होत्या. त्यावेळी तेथील संपर्क क्रमांकावर एका अनोळखी क्रमांकावरून दूरध्वनी आला. टर्मिनल – १ वर बॉम्ब ठेवण्यात आल्याचे दूरध्वनी करणाऱ्याने सांगितले. आपण कोठून फोन करत आहात, अशी विचारणा नेरूरकर यांनी त्याला केली. तेव्हा त्याने इंग्रजीत ‘नवपाडा’ असे उत्तर दिले. त्यानंतर तुम्हाला शुभेच्छा असे सांगून त्याने दूरध्वनी ठेवला.
नेरुरकर यांनी ताबडतोब त्यांच्या वरिष्ठांना ही बाब कळवली. त्यानंतर विमानतळवरील अधिकाऱ्यांनी तात्काळ बॉम्ब थ्रेट असेसमेंट समितीची बैठक घेतली. सर्व संबंधित सुरक्षा यंत्रणांना सतर्क करण्यात आले. त्यानंतर तातडीने विमानतळाची तपासणी करण्यात आली. मात्र काहीच संशयस्पद सापडले नाही.
याप्रकरणी तक्रारीनंतर विमानतळ पोलिसांनी भारतीय दंड संहितेच्या कलम ५०५ (१) (बी), ५०६ (२) आणि ५०७ अंतर्गत गुन्हा दाखल केला. दूरध्वनी करणाऱ्या आरोपीचा शोध घेण्याचाही प्रयत्न सुरू आहे, असे एका पोलीस अधिकाऱ्याने सांगितले. आरोपीला अटक केल्यानंतरच धमकीच्या दूरध्वनीमागील नेमके कारण समजू शकेल, असे अधिकाऱ्याने सांगितले.
