कोणतीही आई स्वतःच्या मुलाला मारण्याचा विचार करणार नाही; महिलेला जामीन मंजूर करताना उच्च न्यायालयाचे निरीक्षण

मुलाचे वडील आणि या प्रकरणातील तक्रारदार याचे आणि आरोपीमध्ये वैवाहिक वाद होते. त्यांच्या या वादाचा फटका त्यांच्या अल्पवयीन मुलाला सहन करावा लागल्याचेही न्यायमूर्ती मिलिंद जाधव यांच्या एकलपीठाने आपल्या आदेशात नमूद केले. याचिकाकर्तीने प्रियकराच्या साथीने मुलाला अनेकदा मारहाण केली आणि एकदा त्याला जीवे मारण्याचाही प्रयत्न केल्याचा आरोप तक्रारदाराने पोलिसांत तक्रार नोंदवताना केला होता. याचिकाकर्तीच्या प्रियकराने मुलावर लैंगिक अत्याचार केल्याचा दावाही तक्रारदाराने केला होता. तथापि, तक्रारदाराने केलेले आरोप हे सकृतदर्शनी अविश्वसनीय वाटतात, असे नमूद करून कोणतीही आई स्वतःच्या मुलाला मारहाण करण्याचा विचार करणार नाही, असे निरीक्षण एकलपीठाने नोंदवले. तसेच, याचिकाकर्तीला अटक करताना फौजदारी प्रक्रिया संहितेनुसार अनिवार्य असलेल्या तरतुदींचे पालन करण्यात पोलीस अपयशी ठरल्याचे मतही न्यायालयाने तिला जामीन मंजूर करताना नोंदवले.

अल्पवयीन मुलाच्या वैद्यकीय अहवालानुसार, तो मेंदूशी संबंधित आजाराने त्रस्त असून त्यामुळे तो अशक्त झाल्याचा निष्कर्ष नोंदवण्यात आला आहे. त्यामुळे, याचिकाकर्तीने मुलाची काळजी घेण्यासाठी आणि त्याला आधार देण्यासाठी खूप हाल-अपेष्टा सहन केल्याचे पुराव्यांतून स्पष्ट होत असल्याचेही न्यायालयाने आदेशात म्हटले.

दहिसर पोलिसांनी नोंदवलेल्या तक्रारीनुसार, २०१९ मध्ये याचिकाकर्तीने पतीपासून फारकत घेतली. त्यानंतर त्यांचा मुलगा रत्नागिरी येथे वडिलांसह राहत होता. तथापि, २०२३ मध्ये, याचिकाकर्ती जबरदस्तीने मुलाला मुंबईत घेऊन गेली. परंतु, मुलाला मुंबईत आणल्यावर तिने त्याला अनेकदा मारहाण केली आणि एकदा त्याला जीवे मारण्याचा प्रयत्नही केला. तक्रारदाराने या प्रकरणी तक्रार केल्यानंतर त्याआधारे याचिकाकर्तीला ऑक्टोबर २०२३ मध्ये अटक करण्यात आली होती आणि तेव्हापासून ती कोठडीत होती.